許廷鏗現身銅鑼灣同巨型廣告牌自拍 「成就自戀界嘅翹楚！」
撰文：洪曉璇
出版：更新：
行行下街見到自己鍾意明星嘅廣告，有時會情不自禁影低甚至同塊廣告牌自拍。人來人往眼望望嘅情況下，其實舉機都需要一定勇氣，更何況係藝人同自己嘅廣告自拍﹗許廷鏗呢日就去到銅鑼灣鬧市，同自己嘅演唱會巨型廣告牌合照放上網，仲話自己：「突破尷尬界嘅盲腸﹗」
許廷鏗最近不停喺街頭同自己演唱會海報合照。（許廷鏗IG）
許廷鏗出道近十年，初出道時嘅牙醫身份成為個人標記，今年終於首度舉行紅館個人演唱會，亦順勢以《再見智慧齒》為題，仲設計一系列關於牙齒嘅宣傳，網友都大讚有心思。
新年時仲大派牙齒造型利是，相當有心思。（許廷鏗IG）
連日來Alfred喺社交網站宣傳個唱，呢日佢去到銅鑼灣親身同巨型廣告版瘋狂自拍，雖然有無限途人眼望望的確好尷尬，但經過十年努力第一次去到呢個位置，Alfred都決定豁出去影完再算：「突破尷尬界嘅盲腸，拋開文青界嘅批判，無視大媽界嘅衝擊，成就自戀界嘅翹楚﹗阿媽我得咗喇﹗你今日影咗未啊？唔敢影、怕醜咩黎㗎？食得㗎？」
Alfred又一成就解鎖 --- 突破尷尬感覺喺鬧市同自己嘅廣告自拍。（許廷鏗IG）