CV不寫期望薪酬　求職者一句解釋嚇呆HR　網民撐：工作內容或不符

期望薪酬（expected salary）反映打工仔的職場價值，不過並無明文規定一定要寫出實際數字，打工仔大可寫上目前薪金，再強調「凡事可商量」（negotiable）或面議。有任職人事部的打工仔於網上發文表示，日前約了1名求職者前來見工，他發現對方沒於履歷寫明期望薪酬，於是致電詢問，怎料對方竟說「我要上嚟見完，睇下你哋公司個職位係做咩，同埋個package（福利待遇）先知開幾錢」，他甚為不解，直言「我即刻黑人問號」。
不過不少網民反斥這名人事部打工仔有問題，並大讚求職者醒目，「正常吖，佢無錯喎，HR嘅奴性都好嚴重下」、「如果個job ad（招聘廣告）冇寫／寫到1999（一嚿嚿），人哋要搞清楚先寫好正常」、「啱呀，到請嗰時無啦啦變咗打雜」。

該名打工仔投稿至fb專頁「奴工處」表示，明明已於招聘廣告列明應徵時須於履歷寫上期望薪酬，但仍會有些求職者不寫。他日前就遇到有名求職者故意不寫期望薪酬，希望了解工作內容和福利待遇後才開價，讓他感錯愕。

他續說，老闆見完該名求職者後，「話佢好proud of（驕傲）自己做過startup founder（初創公司創辦人），同埋住喺隔籬街好想返呢份工，因為好近」，他嘲諷道「我真係笑咗出嚟」。

有網民留言指出該名求職者沒做錯，因現時不少工作的職銜與工作內容不符，「無錯喎，我呢排見工成日都有啲工係個job title（職銜）同佢哋做嘅嘢完全唔同」、「職位名，同要負責做咩嘢，其實可以差距好大（經驗）」、「即時諗起好多人話見文員，又問識唔識剪片，又問識唔識整網頁」、「呢排真係好興咁樣，為咗壓價，話知寫花你個CV，明明個title係好低層，但做埋勁多senior（資深）嘢，等見工啲人俾個title陰到」。