莫文蔚演唱會｜被舞蹈員爆喊包圍要強忍淚水：我喊大家就會失控
一連三場《絕色莫文蔚世界巡迴演唱會香港站》昨晚（13/6）在紅館完滿結束，騷後Karen接受傳媒採訪，坦言心情十分複雜：「做完騷當刻當然係好興奮，但係再諗一陣，完啦喎，真係做完最後一次紅館，最後一次用跑巡唱嘅形式做騷，咁就完咗啦！我唔係好識反應，呢個感覺好古怪。」
尾場最感人一幕，要數一眾在《絕色》巡唱合作已久的舞蹈團，臨別前圍著Karen相擁而哭。她認為場面感人，但當時仍要強忍淚水：「呢啲場面我係唔喊得㗎，如果唔係大家就會失控，你睇到佢哋嗰陣已經喊得好犀利。呢啲唔係事先安排，完全係即興，我哋所有人，包括舞蹈團、樂隊、工作人員，咁多年嚟嘅合作真係好好，嗰嗰都真係好畀心機，好愛我，但係今日真係要同佢哋說再見。」被問到會否後悔決定不再舉行大型個唱，她坦言：「所有嘢都有始有終，雖然到咗要完，要說再見，但係會有以後㗎嘛，我就好期待以後會有啲咩新嘢玩。」
談到一連三晚嘉賓陣容鼎盛，Karen指這次主要邀請有意一起合唱，卻在歌唱生涯從未合作的歌手到來：「雖然有幾位都好熟，識咗好耐，但係唔知點解真係未有合作機會，所以唔諗咁多，趁自己喺香港搞騷就請佢哋嚟。好感激佢哋嚟到，畢竟依家仲喺疫情，但係佢哋都二話不說，一口答應。」
而談到最令Karen感到驚喜的嘉賓，非老公Johannes莫屬。她指在英國逗留期間，老公不時在家練琴，於是想到邀請老公上台獻技，除了挑戰四手聯彈，老公也為Karen伴奏《再生》，被問到對方表演前有否明示自己緊張，Karen指：「佢冇講，但係睇得出係緊張嘅。其實正常人都會緊張，就算你喺屋企彈得幾勁都好，但係佢要無端白事上台，對住咁多觀眾，係一件好唔同嘅事。」
對於早前《婦女新知2021》MV中穿著D&G品牌而引發風波，Karen回應事件時感到非常後悔：「我好嬲自己冇問多句，因為呢半年我都專心做緊演唱會嘅嘢，有好多好多嘅籌備工作，同埋有新唱片，仲有其他嘢，所以去到搵人幫手做衫嘅環節，我就冇再過問，因為覺得唔需要。向來我都唔介意啲衫係咩牌子，但係原來要著重，每個細節都要問清楚先好做，今次除咗我自己，仲有我嘅團隊都係疏忽咗，以後都唔可以有呢啲事情發生。」