想喺香港共建家庭:要三世前儲錢、仲要學識忍受你唔鐘意嘅人!

撰文:詩寧
出版:更新:

女生,我哋由細到大都响往愛情,希望揀到一個鐘意嘅人共建家庭,可以同呢個人一齊製造好多美好回憶,成長以嚟為達到呢個目標,歷盡暗戀、單戀、雙戀、失戀......好唔容易搵啱對象,先發現想喺香港「共建家庭」,可能要三世前開始儲錢。

作者:詩寧

人生道路有好多條,有人響往浪跡天涯,有人想落地生根,如果你追求嘅係「買樓、結婚、生仔」呢三樣咁平凡而複雜嘅事,咁你先要學識放低個人喜惡,要甘心面對唔鐘意嘅人同事。

《繼母與女兒的藍調》由綾瀨遙、竹野內豐及佐藤健主演,劇中女強人綾瀨遙本為女強人,卻願意為當「媽媽」有人陪伴而放棄大好前程。而人生的取捨,本來就從無間斷。(《繼母與女兒的藍調》劇照)

為咗日日對住鐘意嘅人,先要日日對住唔鐘意嘅人

我出嚟打工未夠十年,裸辭過……廿次?或者更多,返過嘅工咩類型都有,自己都數唔清了。一向話辭就辭,都無咩考慮,直至結婚嗰年,第一次感到掙扎,買樓、裝修已經使咗好多錢,仲要擺酒真係好大壓力,但份工返得唔開心,日日都好抑鬱。

我相信香港每一個打工仔都明白呢種抑鬱情緒,呢個同事咁咁咁,嗰個老闆點點點,死忍爛忍,唔開心都博命做,有時一瞓醒就希望天黑,咩都唔想理。

綾瀨遙《繼母與女兒的藍調》劇中除了要學習與「女兒」相處,更要學習忍受家長會及更多的人與事。(《繼母與女兒的藍調》劇照)

但我哋身處嘅城市叫香港 —— 一個貌似好多選擇,其實連最基本嘅嘢都無得你揀嘅城市。飛機上望落嚟,香港好多樓,但好多人無得揀,要住劏房;返工食Lunch,周圍都係餐廳,但得一個鐘頭食飯,除咗快餐無得揀;求職網有好多工,但你內心知道周圍都係伏,其實都係無乜好揀。

任我哋點努力,似乎都未改變到個社會(或者係一世都改變唔到),唔會移民,就唯有順住遊戲規則去玩,呢個城市樣樣都講錢,只能不斷返工不斷搵錢,搵錢係為咗可以對住鐘意嘅人,做鐘意嘅事,但在此之前,首先要學識同唔鐘意嘅人相處。

+5

到而家,我嫁咗連仔都生埋,先發現呢句說話除咗用於職場,原來成個人生都一樣,嫁「人」,背後係嫁一個「家族」,另一半嘅「家族」對你嚟講其實係陌生人,純粹係你鐘意咗呢個「家族」入面其中一人,所以背後幾十人都同你有咗「關係」,當中可能有人係你唔鐘意,但基於種種原因你唔可以唔理佢,為咗同你鐘意嘅人相對先要忍受、遷就你唔鐘意嘅人。但呢種忍耐係值得嘅,因為你鐘意嘅人會有眼睇,佢見到你為佢所作嘅付出,佢都會感激你、更錫你。

「愛」本來就要學識付出,拍拖時候嘅付出可能係大時大節送禮物,婚姻嘅付出,就係雙方喺唔同成長背景之下,如何相處?喺生活之間協調。

延伸閱讀:

瑞典人生活哲學「Lagom」:從不OT,與戀人一起享受的剛剛好生活
【無法成為野獸的我們】你不是職場清道夫,唔需要乜都幫人執!

(《繼母與女兒的藍調》劇照)

生完BB,整個人生更加喺自己控制範圍之外,做咗半年全職媽媽,越來越發現個生活唔適合自己,原來返工比起打理一頭家容易得多,有時會諗點解當初唔一直失戀到老,自由自在多好?左諗右諗,最後請個外傭幫輕下自己……屋企多個外人,總有問題、總有擔憂,但為咗令小朋友生活好啲,已經唔到我諗鐘唔鐘意。忍耐是痛苦的,但時間一點一滴走,慢慢見到個仔生活質素提高,我又多咗時間休息、建立自己興趣,媽媽心情同精神好,我的家也越來越多笑聲。

一步一步走,我只係想喺香港過非常平凡嘅生活,原來最基本係要學識放低所有「唔鐘意」嘅感覺。作為一個慣咗急速嘅香港人,為了自己的家,忍耐、靜候是必須的。