【職場生存手冊】想升職不只靠勞力:識令老闆鍾意你先係王道!

撰文:
最後更新日期:

喺香港打工好辛苦,唔係因為工作範疇辛苦,而係我哋要顧慮嘅嘢實在太多喇。如果你已經有幾年工作經驗,會發現落每一個決定之前,除咗諗「點做係對件事最好」之外,仲要諗「點做先令老闆開心」,有時明知用方法A係比較蠢,但若老闆係鐘意方法A,你都要照做。做嘢做得好只係基本,識令老闆鐘意你先係皇道。

作者:詩寧

(《無法成為野獸的我們》劇照)

我哋改變唔到個社會,唯有跟個遊戲方式玩,承認「適可而止嘅擦鞋」係有助仕途順暢,但要「擦鞋」擦得正確,先要識得「收風」,如果你過於自閉,只係埋首工作而唔埋堆,咁你又點捉老闆心理?另一方面,老闆連你個名都叫唔出,想升人嗰時又點會諗起你呢?

(《無法成為野獸的我們》劇照)

有心想升職?善用lunch time,忌做「獨家村」

Marius係IT專材,對自己專業範疇做得唔錯,亦都好勤奮,同事日日一齊出去Lunch,Marius就帶飯,因為佢想快啲食完又繼續工作。就係因為咁,佢每日都聽少好多公司「資訊」,同事食飯除咗講是非同呻多嘢做之外,仲有好多有用嘅「資訊」例如老闆嘅喜好、嚟緊想轉用乜嘢新System、辦公室政治中邊個上緊位……

公司入面所有新決策,Marius都係同Team之中最遲一個知,咁樣有咩損失?喺新決策進行之前,其他人已經有晒心理準備,大概知道點樣認對,而Marius要等到公司出正式Email先知道件事,自然會被殺個措手不及,喺老闆眼中就係「點解你反應咁慢?」,適應期比其他同事長,跟唔上,辛苦嘅係自己。

+2

「擦鞋」有技巧:切記走火入魔

「擦鞋」或者「收風」係一種技巧,踴躍得嚟要低調,太高調、過火就容易犯眾憎。

Christy自認醒目女,佢只會做一啲有功領、老闆見到嘅工作,老闆唔重視嗰啲Project佢就扮唔記得或者搵機會塞比其他同事。Christy的確係呃到老闆,好快就做咗老闆「傳聲筒」,即係老闆有咩都會先同Christy講,叫Christy轉達比其他同事,慢慢地,Christy口頭禪就係:「阿姐話」。

(《無法成為野獸的我們》劇照)

「阿姐話你地份Report錯好多grammar,覺得你地英文唔夠我好呀。」

「阿姐話點解你地可以準時放工,係咪太少嘢做。」

「阿姐話我太多嘢做,叫我分啲嘢比你哋喎,我都唔想架。」

其他同事聽到Christy下下撻老闆出嚟,當然唔順耳,慢慢對佢積落唔少怨氣,但老闆信佢,同事們唯有忍。

直到有一次,Christy要去歐洲旅行,放三星期大假,無咗個傳聲筒,老闆終於要直接同其他同事對話,一傾就發現Christy一直喺中間將老闆啲說話亂傳達,更甚係無中生有假傳聖旨,老闆同同事知道後大怒。

(《逆向誘拐》劇照)

當然老闆唔會再靠Christy傳聲,同事亦認定佢係大話精,佢講嘅任何說話都無人信,自此,Christy喺公司好似透明人咁。

想上位,單靠勤力或者單靠擦鞋都好易得個吉,如果真係想喺間公司長遠發展,記得定期檢視下自己喺公司嘅人際脈絡。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。