職場小人輕易擊退!擦鞋仔應對有技巧 哪種人最需要小心提防?

撰文:
最後更新日期:

《Second act》劇照

懶醒是需要練習的

我鐘意返工,因為我鐘意觀察同事們為咗生存、上位而衍生出嚟的不同嘴臉,當然有時佢哋會害到我,但每畀人害一次,又學識點防避小人。小人有好多種,今篇講啲初級啲嘅:擦鞋仔、懶醒收風王、搭嗲達人。

作者:詩寧

《她的私生活》劇照

擦鞋仔

出嚟做嘢,無論你幾有真材實料,擦鞋技倆都是必須的,只不過,適可而止的擦鞋可以令人開心;過火就令人嘔心。點先係適量?好多時擦鞋仔都當局者迷,好易唔覺唔覺擦多咗而成為眾人笑柄,如果你擔心自己功力未夠,建議先擦少啲,練熟咗先再表演,以免犯眾憎或者衝出嚟畀人笑。

《未生》劇照

Jacky喺眾人眼中係一個不折不扣的擦鞋仔,但佢完全唔知其他人係咁睇佢,仲成日以為自己掩飾得好好。有次Lunch Time,老闆興高采烈拎住一個大盒返嚟叫同事們睇佢開箱,大家都好合作交戲,扮晒興奮:「買咗新嘢呀?咩嚟架?」老闆沾沾自喜話係限量版波鞋,只有英國先有得賣,因為佢識人乜乜乜所以訂到嚟香港……大家繼續交戲:「嘩…嘩…嘩…」老闆一邊講一邊開盒,點知Jacky突然好浮誇、大聲:「嘩!真係好靚呀!」呢個時候所有人包括老闆都靜咗,大家望向Jacky,有同事忍笑,有同事忍唔住串佢:「都未打開個盒你就知好靚?」、「定係你想講個盒好靚呀?」、「個盒無咩特別,白色架喎…」最正係,連老闆都忍唔住多加句:「你呢句,如果遲多5秒先講就啱啱好喇。」

Jacky個樣尷尬到不能,交戲唔係問題,但起碼要啱Timing,如果你無信心,就唔好做帶頭嗰個,都係等人哋講完你先開口表示認同罷啦。

《未生》劇照

懶醒收風王

邊個升職、離職,直接影響辦公室局勢,所以「收風」好重要,但有一種同事係好刻意顯示自己知道好多「秘密」,但係表面又要扮唔講你知,實際上卻好想你問佢,佢根本就口疏守唔到秘密。

秘書Amy就係呢種人,成日流連於茶水間,好似同所有斟水嘅人都好熟咁,乜都八,但當你有嘢問返佢,佢就講啲唔講啲。有次公司傳聞會有高層調動,佢就周圍同人講話個高層畀人炒,結果個高層畀人「炒」足一年都仲喺公司返緊工,唔清唔楚的事真係唔好講出口,成笑柄事小,造謠生麻煩事大。

《未生》劇照

搭嗲達人

「健談」係好事,但「多口」就令人燥,同事Peter把口由朝到晚都唔停,除咗狂吹水嘈住人做嘢之外,仲要任何同事傾任何嘢佢都會搭嘴,有次同事煩惱個租客成日遲交租,Peter未置業亦無租住過私人樓,但就搭咀:「斷佢水、斷佢電就會交租啦!」呢類咁冇建設性又唔可行的意見真係令人唔知畀咩反應,所以佢經常係話題終結者。

閒聊搭嘴都算,公事搭嘴先多得佢唔少,有次同事同上司爭持緊Budget問題,同事想要多少少Budget落廣告,正努力說服上司,上司猶疑之際,Peter突然出聲:「Budget唔夠,你落多幾錢力去諗啲唔使錢嘅宣傳方法咪得囉!」佢隨口講一句,令上司被「叮!」一聲提醒咗,結果就害到同事晚晚放唔到工。

以上三種「初級小人」,其實都唔係黑心,而係性格影響到人而不自知(或者知但唔改善)。不過唔好睇少呢啲人所製造嘅煩惱,畀人害都可以防,但對方純粹蠢就唯有敬而遠之,唔好同佢熟。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。