吳浩康爆郭思琳家中話晒事 指自己冇地位發言權：你估我好威呀？
撰文：吳子生
出版：更新：
吳浩康（Deep）今日（29/4）現身美孚出席限定音樂會大展歌喉，與粉絲近距離接觸，愛妻郭思琳和囝囝及外父外母亦有到場支持，場面熱鬧。
吳浩康開騷，太太郭思琳和囝囝及外父外母亦有到場支持。（吳子生攝）
講起湊B心得，阿Deep接受《香港01》訪問時表示：「其實我管教囝囝係比較寬鬆，但對太太就比較嚴謹。（對太太嚴謹啲咩？）其實我喺屋企除咗提供一切生活所需，我係冇乜發言權，亦都冇乜地位，咁所以我係冇得執行嚴謹。我嚴謹嘅時候會係啲咩？就等於我老婆嗰一刻要嚴謹，我咪要嚴謹囉，如果我老婆嗰一刻鬆啲，我咪鬆啲囉。（你係暖男！）唔係，你估我喺屋企好威呀！我唔同你講大話嘅話，我係心甘命抵嘅，但心嗰句可唔可以好啲呀！俾我話少少事呀，例如揀雪糕都俾我揀吓咩味。」
吳浩康笑稱太太郭思琳在家中話晒事，自己冇地位冇發言權。（IG@ngdeep）
好友張致恒與太太雯雯經常傳出婚變、被人追數等負面新聞，更不時在社交平台呻窮，稱生活拮据，公開向網民求助，惹起網上熱話。被問到今日為何不邀請好友張致恒出席音樂會，阿Deep禮貌表示：「唔講Steven。」
吳浩康稱自己在家中沒有地位。（吳子生攝）