【三個傻佬學煮餸】鹵水鴨鬆生菜包　自製潮州打冷美食

漫畫家楊學德與美術總監Susanna，到訪三傻廚房，指定食鴨。Jeffrey大想頭，竟敢挑戰北京填鴨，但，家居又何來吊鴨大爐？！結果當然失敗而回。Jeffrey以靈活見稱，轉移陣地，專攻鹵味，勝在可以住家操作。

潮州食店招牌菜係鹵水鴨鵝，其實自家製不難，用鹵味材料包，開水即可，不過份量要自己調校。Jeffrey初學，跟足網上份量，亦試過整隻鴨爛蓉蓉，但第二次已經成功，鹵鴨似模似樣。讀者大可參考以下配方，自家試煮，很快通曉。

三傻合作，互見長短。Jeffrey怕鏡頭，菜式好味，但賣相不佳。今次他洗心革面，集中改善兩個弱點。為了戰勝鏡頭，佢竟然預先度定劇本，反覆練習，直情好似播音員練咬文嚼字咁樣，仲度埋個爛Gag添。上鏡之時，他突然唱歌跳舞搞氣氛，現場所有人馬上笑至人仰馬翻。

第二個弱點是菜式冇乜顏色冇乜睇頭。今次嘉賓仲係美術、設計界的朋友。鴨鬆炒埋一碟，除了鹵水鴨肉粒，還有枝豆、松子，口感好、味道好，但鹵水顏色好瘀，Jeffrey就想到用紫椰菜與淺綠色的生菜伴碟，結果賣相鮮艷清爽，一洗鹵味頹氣。

鹵水鴨鬆生菜包

食材：滷水鴨、滷水牛展、豆卜、枝豆、椰菜、生菜、夜香花。
調味料：日本白味噌

做 法

1.　滷水鴨起肉切粒，牛展，椰菜切粒。
2.　落油炒香蒜蓉，加入白味增及水。
3.　滾後落椰菜，菜七分熟後落滷水鴨、牛展及豆卜。
4.　九分熟再落枝豆及夜香花。
5.　煮三至五分鐘後完成，把生菜夾鴨鬆來食便可。

（所有相片由作者提供，文章純屬作者意見，不代表香港01立場。）