【深宮計．專訪】學徒變酒廊歌王　李龍基：唱一個月可買一層樓！

那天下午，李龍基來到銅鑼灣一家訂製西裝的樓上舖。
午後忽爾微雨，悶熱仍驅不散，訪問還未開始，戴上紳士帽的基哥正襟危坐，一邊擦汗，一邊乘涼，一邊靜候，恰似正在耐心細聽下屬稟告的「皇上」。
是的，他由1985年《鍾無艷》飾演齊宣王開始，去到2018年《宮心計2深宮計》以唐睿宗李旦一角登場，凡卅多年，就算一身「微服」，仍蓋不住「皇氣」：「而家TVB啲人都唔係叫我李龍基，一見到我就叫『皇上』，哈哈，可能真係太深入民心。」縱觀港九新界，大概只有他才配上得起「朕」這個自稱。
堂堂「一國之君」，家財萬貫乃必然，豈會窮困潦倒？但脫下那襲「龍袍」，李龍基卻是貧富皆嘗，財運如坐過山車，80年代投資生意蝕大錢，最終倒錢落海，蝕了數百萬，「樓又賣晒，車又賣晒，仲要俾啲貴利追！」乍聽有點黑心，但任誰也好奇：要蝕錢，必先有錢，錢從何來？基哥說得坦白：「嗰陣時喺酒廊餐廳唱歌一個月，可以買到一層樓！」即是多少？我給他一個數：20萬？他隨即「還價」：「24萬！」他的語氣愈是慢條斯理，愈是從容，愈見霸氣。
「皇上」並非含着金鎖匙出世。1971年他走到嘉頓當「油屎仔」，機械學徒是也，只因家貧，就算成績比別人優秀，唸完中六也無法繼續升學，後來因為參加《聲寶之夜》獲經理人賞識，輾轉間靠唱歌賺錢，其他人靠知識改變命運，李龍基卻透過演繹一首首好歌，從此逆轉人生。
撰文：游大東
採訪：游大東、陳栢宇
短片拍攝：陳順禎
場地及服裝提供：852 TAILOR HOUSE

李龍基自細在屯門長大，於中華基督教會何福堂書院畢業。

彼時屯門公路還未開通，活在大西北，有如流放邊疆，別說遠征港島，坐長途車出九龍已是「打大佬」級數，其中一次經歷，數十年後仍能成為基哥的青春時代重要回憶，當然不是迷失彌敦道吃喝玩樂增廣見聞那麼膚淺，「記得讀中學嘅時候，Form 1、Form 2已經上過電視，嗰陣時好巴閉㗎！」說的是當年才開台不久的無綫，邀得許冠傑與Lotus（蓮花樂隊，許冠傑為主音）和余杏美主持的後生仔節目《星報青年節目Star Show》，周一至周五傍晚六時播出。

中學時代衝出屯門　駕臨廣播道現身無綫

「點解會上電視呢？當年屯門、元朗嗰區嘅中學有個夏令營，畀啲學生放暑假唔好周圍走，集中喺一個地方玩、學習同埋訓練，到個活動完結時，每間學校都派一個人出嚟表演，其實嗰時我喺學校都幾巴閉下，係風頭躉，嗰日我就喺度唱，唱完之後有人問我想唔想上電視（表演），嚇我一跳。」基哥從記憶中推算，當時只得13、14歲，但可以在翡翠台亮相，而且節目裏更有許冠傑與Lotus、泰迪羅賓與The Playboys演出，級數跟80年代梅艷芳、張國榮、譚詠麟沒兩樣，有多轟動可想而知。

一不離二。幾年後，基哥經已中學畢業投身社會，他再次現身無綫，今趟並非表演者，而是參賽者。「我本身鍾意唱歌，但一直只會喺自己屋企玩吓，或者喺教會度拎個結他出嚟唱，之後去咗參加《聲寶之夜》，不過輸咗畀個女仔。」他解釋這個香港「元祖級」歌唱選秀節目，其中一個看得觀眾又興奮又緊張之處，是幕前那五盞燈，五燈齊亮即滿分，主持人與觀眾隨亮燈數大叫「一盞燈、兩盞燈、三盞燈」，電視內外氣氛皆高漲，「每盞大燈之下又有4粒細燈，四五中二十，即係話着晒就有20粒小燈，我就得到4粒大燈，16粒小燈，有個女仔多我一粒小燈，所以我輸咗。」勝者雖勝，然而失敗者得到更多，如是者過了大半年，基哥收到一個電話，「有位仁兄打嚟，佢話係乜乜娛樂公司，係喺TVB搵到我電話，約我上去傾，話同我簽個Part-time 合約，唔需要做啲咩，係有需要時叫我出嚟唱幾隻歌。」當時他已在嘉頓當學徒，有正職收入，但可以偶然唱歌，寓工作於賺外快，一個月多了幾百蚊，沒有推卻的理由。

基哥說，其中一種演出方式是暖場。「溫拿、陳秋霞嘅演唱會，我就會打頭陣。」初為兼職，但唱呀唱，未幾便得到EMI青睞，邀唱Demo，「經理人同我講，話唱兩隻Demo畀佢哋聽，得喎，佢就話再搵幾隻主題曲返嚟畀我唱。」先為佳藝電視獻聲，兩套日劇，一套日本卡通 ── 《過山虎》、《婚變之謎》還有《金剛飛天鑽》（無綫版本改譯《磁力鐵甲人》）。後來佳視結業，基哥的經理人轉戰麗的，《巨星》（1978）、《浣花洗劍錄》（1978）、《怒劍鳴》（1979），其中《浣》一曲改變基哥的星途，「當時唱片公司就監製蕭笙叔講：你同佢化個妝，所以《浣花洗劍錄》個唱片封套係古裝嚟，化完妝，蕭笙叔話：咦，呢個樣幾好喎，喂，同我客串幾個鏡頭，直至佢後來過咗去無綫，蕭笙叔可能仲記住我呢個樣，於是就叫我客串王重陽（《神鵰俠侶》／1983）。」不過要去到兩年後，梁家樹監製的《鍾無艷》開拍，李龍基才正式變成演員，那是後話。

山東街初試啼聲　逗客有技巧愈唱愈旺

1977年至1985年這段時間，乃事業建立時期，李龍基的身份仍是打工仔，歌手只是兼職，「我諗係1977年，當時我仲喺嘉頓打工，經理人已經安排我去一間Lounge試唱，嗰間餐廳叫麗斯（Ritz），喺山東街，地庫嚟嘅，得一支咪，有個Stand，我就拎住支結他係咁唱，所以嗰陣時真係好辛苦，日頭要返嘉頓，夜晚又要唱。」他憶述，那個年頭的酒廊，演唱者的前面總會擺放一個架，用來擺放歌書，但很多時都是「各自修行」，「樓下啲客都唔聽，自彈自唱冇人理，所以我唱嘅時候一定唔要呢個架，我睇住晒啲觀眾，當然，我係好畀心機唱，有時候得到好多掌聲，都會覺得自己受歡迎。」

江湖傳聞基哥逗客有一手，懂得營造氣氛，他認為這是突出自己的一種方法，「要留意吓佢哋做緊咩嘢，突然間有個蛋糕拎出嚟，畀個女仔：『嘩～～！恭喜你喎，生日快樂，今年60呢？』撩佢囉，多啲互動，當佢話：『六咩十呀？』我就話：『你聽錯咗，16啫！』」基哥說，但凡有這些台上與台下的溝通，客人會自覺受重視，覺得飄飄然，「變咗有時候唱得衰啲都冇所謂！」但認同技巧上要拿捏得準，不然「撩女仔」隨時撩出禍，收工後俾人打。正因如此，基哥在麗斯餐廳愈唱愈紅，「最初老細同我經理人講，話點知我咩料，請兩個月試吓先，點知兩個月後，老細話整多兩個月，再唱完，又整多兩個月，然後再整多三個月，卒之唱足9個月，之後經理人就唔畀我再唱，去唱夜總會。」亦在差不多時間，他去了麗的唱歌，又辭去嘉頓的正職，以為就此一帆風順。

【深宮計專訪李龍基（上）】認年輕時搵錢多   人如昏君李旦心軟蝕清光

與經理人分開　盛世中餐廳唱歌搵到食

然而人生際遇難測，唱罷麗的幾首劇集主題曲後，他與經理人因為意見不合而分開。「當時係1980年，我同經理人分開咗之後冇收入，咁啱有個朋友嘅朋友，喺英國返嚟香港搞咗間餐廳，問我有冇興趣去餐廳嗰度唱歌。」基哥最初有點遲疑，畢竟在餐廳裏演唱，儼如「陪客食飯」，跟站在夜總會台上閃令令亮相人前成為眾人焦點，是兩種級數，年少氣盛，難免只看表面，但現實是口袋沒錢，「無計啦，冇收入，死死地氣就唱啦！」已結業多年的佐敦道大華餐廳，就是基哥1978年辭去嘉頓全職後，第一次坐上「白金升降機」的地方。

那時候，香港經濟急速起飛，市民生活愈見富有，加上戴卓爾夫人還未從倫敦飛往北京與鄧小平商討香港前途，香港人沒有甚麼需要擔心。日落西山後，一望無際的霓虹燈統統亮起，無需任何描述，都知道這就是繁華盛世了，夜夜笙歌，即在眼前，而當時的消遣娛樂，基本上以睇電視、看電影、去酒廊為主，假如像劉以鬯先生那樣寫文賣字都可以一筆過買入太古城，那麼李龍基靠唱歌賺到「第一桶金」也絕不稀奇，當然並非一開始就那麼順利。「嗰時一晚唱4個鐘，每個月休4日，即係禮拜日休德，好似係賺4,000一個月，可以養妻活兒嘅，都幾辛苦㗎！」

【嘉頓重建】歌手李龍基曾是嘉頓工程師？ 「灑芝麻機我設計嘅」

最風光一晚走8場　月入24萬

不過「捱苦」的日子不算很長，基哥很快就成為歌廳酒廊界別的搶手貨，基哥形容當時絕對是「瘦田冇人耕，耕開有人爭」，「大華餐廳嘅位唔算好多，百幾個，我喺嗰度唱唱吓冇幾耐，就每一晚都爆棚，唔係禮拜日，係每一晚，間餐廳喺二樓，嗰啲人就喺條樓梯一路排落去喺度等，排到出街外面。」口碑相傳，未幾，收到另一餐廳老闆邀請，「叫藍帶餐廳，Cordon Bleu，喺新世界中心嘅，佢老細嚟搵我，問我有冇興趣過去唱，我話好，但我同你唱兩個鐘咋喎，不過都係收你4,000蚊，跟住我同『大華』老細講，我唔唱4個鐘，改唱兩個鐘，都係收4,000蚊，佢又制喎，如是者，就由4個鐘變兩個鐘，兩個鐘變一個鐘，其他嗰啲唱唱吓，差唔多Regular每晚走8場，7點鐘開始，唱到凌晨3點幾，元朗、大埔、九龍、香港仔！」名副其實的一把靚聲走天涯，縱橫港九新界，當時他才不過加入這個行頭一年左右。

到底如何一晚走8場？基哥話，學伊健啦！吓，乜話？頭搖又尾擺飄移境界？「當時我揸架Porsche（保時捷），揸得好快，真係好快，試過有次喺元朗開到148 km/h，快到我自己都驚，收油收油。」轉場要飆車，只因時間太趕，「由呢個場去到嗰個場，15分鐘！」所以根本沒有時間當乖孩子，而是直接當街停車，唱完即走，那怕是「炒牌高危區」彌敦道，照泊可也：「冇辦法，我冇理由搵個停車場泊車之後再落嚟，唱完再上返去攞車，所以一落度嚟，3張『牛肉乾』，90蚊，畀！我試過一個月交咗9,000蚊！」不要緊，因為賺得到，「嗰陣時唱一個月可以買一層樓。」是傳聞的20萬？「係24萬！」

曾付出幾多心跳，來換取一堆堆的發票，月賺24萬，可以買到的，豈止幾隻錶？

當陣時一九八幾年，我已經有4層樓、5架車，包括一架Porsche，一架寶馬，一架Benz、兩架日本車，但我一個屎忽喳！

豪氣程度，不遜今時今日在廣東道一帶狂掃名牌的內地人。回望那時的意氣風發，基哥只記住光陰給他的教訓，「而家諗番轉頭，覺得真係好蠢，唱得太多，應該收貴啲，唔好唱咁多，又冇咁辛苦又冇咁危險。」

聲帶出事　精神瀕崩潰

「危險」在身體出事差點永久封咪，他說那次在元朗飛車飆上148 km/h後醒覺，減少演出場數，由1981年的高峰期的8場減至6場，再逐步減至一場，最終試過停工大半年，「一方面同自己嘅健康有關，嗰陣時太緊張喇個人，又要連趕幾場，上到台又要Please觀眾，谷到自己好行，唱咗大約一年幾之後，我唔得喇，去睇醫生，佢同我講，我嘅精神接近崩潰，成日都要食啲唔知咩藥，可能係有鎮靜或安眠作用，瞓瞓吓會扎醒，之後成身汗。」

沒有最差，只有更差，睡不好，還不如搵食架生有事那麼困擾，「當時聲帶開始變，好彩未結繭，諗番轉頭，好在有臨崖勒馬，如果去到要開刀刮繭，把聲冇救㗎喇，冇得返轉頭，唔會再靚。」彼時香港的演藝娛樂事業威震亞洲，機會多到數不完，沒得唱，還有路走 ── 拍劇去也，結果由1983年《神鵰俠侶》的王重陽，一直來到《宮心計2深宮計》的李旦，凡卅五年。

尤伯連納是啟蒙老師　靠睇戲自學提升演技

大概自覺平庸，多年來都認為上一輩的人又聰明又叻，叻在任何事都可以自學，而且可以學得精！李龍基中學時期已是唱家班，那是天賦，演技呢？他坦言未曾接受任何正統演藝訓練，但今天又會有誰敢質疑基哥並不好戲？我好奇，究竟基哥怎樣無師自通，成為演技派？怎樣掌握飾演皇帝該有的神髓？「好得意，其實我好鍾意睇戲睇電視，我就會諗，咦，點解佢哋喺戲入面，會畀到一個真嘅感覺我呢？點樣可以做到呢？例如成日睇到啲外國演員喊，如果畀着係我，點先可以喊到出嚟？」

眾多上一兩代的外國明星，基哥說奧斯卡影帝尤伯連納（Yul Brynner）是他的啟蒙老師，「好多光頭佬都係啲油頭粉面，但尤伯連納喺《七俠蕩寇誌》（The Magnificent Seven，1970，飾演Chris Adams）雖然都係光頭，但點解可以光頭得嚟咁有型？仲有，佢掹支槍嘅時候，幾有型，《國王與我》（The King and I，1956）又係佢，所以細個嗰陣啲外國明星對我啟蒙好大。」

說到舊時，基哥總是如數家珍，很多名字、戲名，都是新一代的人不知曉的，比如他繼續解釋演技修養，以《The Magic Bow》（1946）作為例子，旁邊另一位記者霎時「黑人問號」：「中文名叫《劍膽琴心》，就講17世紀有個好出色嘅小提琴家Niccolò Paganini，係史超域格蘭加（Steward Grangerd）飾演，我屋企仲有餅錄影帶喺度，我好鍾意拉小提琴，所以睇套戲嘅時候，知道個主角唔識拉，但係佢似到十足，我心諗點解，後來了解到每個演員即使唔識拉，都會搵老師去教，真係唔得（不懂拉小提琴），但隻右手好似，睇得出佢係落咗好多苦功，你睇史泰龍演《第一滴血》（First Blood，1982）操到幾Fit……」咦，突然「跳掣」？其實基哥想說，呢個世界沒有符碌，要成功必先努力，「符碌嘅人兩嘢就冇咗，你能夠保持落去，一定要付出好多努力。」莫怪乎，李龍基今天依然有得繼續演，繼續唱。

直認得罪女高層　拍《洛神》削戲份意興闌珊

晃眼間，入行逾40年了，怎會沒有經歷高山低谷？基哥說，自從1981年無綫高層馮吉隆（馮寶寶兄長）親自到訪酒廊邀請他加盟，唱過《情迷》（1981）、《男子漢》（1982）、《佛山贊先生》（1982）、《花艇小英雄》（1982）和《再版人》（1984）幾首歌之後，1985年參演《鍾無艷》，正式轉攻演劇，初為部頭合約，「之前係歌星約，去到1990年開始改簽藝員約，一路做做做，做到離開TVB之前，我可以講我喺TVB入面好吃香，冇乜邊個監製唔鍾意我，我試過同一期孭住5套劇，做到黐線，同埋每套劇嘅角色份量都好重。」直至拍罷《天子尋龍》（2003首播），他遭無綫裁員，維基百科寫是因為當時大台要瘦身，但基哥說，真相並非如此：「講真，我唔係大裁員嗰陣時裁，我都唔怕講，當陣時我係得罪咗TVB嘅高層！」

高層係男定女？「唔講！」 點解得罪？「都唔好講喇！總之就係，我自己好清楚呢個感覺！」

游大東其他文章：

突改播《特技人》 　億元巨製《再創世紀》監製認延期：7月趕唔切

【Plan B】陳啟泰10年後再拍劇 脫眼鏡演黑幫：呢個仲似我真人！

【詭探前傳‧有片】秋官不怕無綫嬲豬：佢哋唔鍾意咪拍啲好嘢囉！

【非分熟女】台灣視帝吳慷仁「融入家中」 演港式茶記廚師學拋鑊

已屆半退休狀態　直認沒有鬥心

感覺最強烈一刻，是2001年參演《洛神》（2002首播），飾演辛毗一角，同劇有馬浚偉，亦有蔡少芬，「初初小青姐（梅小青）叫我做呢套劇，係飾演曹操嘅管家，仲特登捉咗我上去傾，話呢個管家角色係點點點，老實講，如果唔係重要角色，使乜捉我上去講啫？」他說，頭三集明明佔很多戲份，但之後明顯有變，「企喺曹操隔籬，對白講：『係，老爺！』甚至有幾集係冇嘢講，齋企，咁搵個大茄呢啡做都OK，拍完呢套劇之後，我覺得係時候離開TVB。」

作為一家之主，基哥憶述，當他向太太說無綫很快會落手炒魷的時候，「嚇死佢，嗰陣時又要供樓，又要呢樣嗰樣，我話你唔使驚，你老公有本事養你，OK？！果然，上天安排好好，我離開了無綫之後，出到去搵錢仲多，又Free喎。」來到《深宮計》大結局，李龍基穿上李旦的戲服，平定太平公主（陳煒飾）的兵變，甚有氣勢，相當搶鏡，但他到最後還是讓李隆基（馬浚偉飾）上位成為「終極大佬」。

我問基哥，去到這個年紀了，對自己的事業會不會再有任何鬥心？他搖搖頭：「而家我都67歲喇，早幾年仲有鬥心嘅，但呢幾年，大吉利是咁講句，身邊好多朋友都走咗，諗一諗，真係做人好多時，好努力好努力，忽然間就走咗，冇意思，況且今時今日，唔憂柴唔憂米，大口氣啲咁講，仲搵啲乜嚟博呢？半退休喇，唔好搞我，而家個心態係，有得做，我就努力去做，冇得做，就努力去玩。」

歷史裏的皇帝總是身不由己，但這個港劇裏的皇帝，卻可以「輕輕鬆鬆鄧梓峰」，選擇自己想過的人生，所以他說話時，總是那麼從容，那種神態，是無法演出來的。