TVB相隔22年再翻拍經典劇集《包青天再起風雲》，相信劇集內容都是離不開打打殺殺同查案，而在該劇《色字頭上一把刀》單元中飾演女主角湯曉晨的傅嘉莉就正正因為該劇要做打女而令她感到深刻，在自己社交網站寫下千字文大談感受，認為做一名功夫演員十分不容易，當中的辛酸更是她覺得從影以來最辛苦的更打到想喊添，可想而知功夫演員真的不容易。

過往有睇開傅嘉莉演出的電視劇都知道，不是做千金小姐就是上等人《乘勝狙擊》的霍曦昕﹑《財神駕到》的連芷蓉…大家對她的演技印象始終停留大家閏秀影子中，沒有太多的突破。不過在最新電視劇《包青天再起風雲》中，她飾演湯曉晨是打得之人，有望令觀眾對她刮目相看，而她就正正因為飾演這一個角色令她得到好大的體驗，更打到想喊認為是自己從影以來拍的最辛苦的劇集，「琴日是我從影以來最辛苦的，但亦是令我最興奮，最深刻，最難忘嘅。成個腦，成個人很多思緒情感湧現。體驗到做一位打功夫的角色一D都唔容易，比我想像中難好多。短時間內要記熟招式，馬步，功架，對白，情緒，思維，其中一樣錯都唔得，仲要配合機器，燈光，有限嘅時間和唔夠瞓嘅狀態。」只係聽她這樣講就知道有幾辛苦。

就正正因為自己好少拍動作戲，幸好身邊不同的演員教導而令她得益良多，因為這樣燃點了她一團火：「第一好感動嘅，身邊對手好主動教我和幫我，令我演得更有信心，我真是好開心，講真每一次同演得之人合作，我都有點壓力，冇諗過開劇依兩日已經開始有嗰團火和默契，真是好鼓舞，見到佢哋真係覺得自己嘅阿爹同埋家姊，好多謝KK，定欣，YoYo，康仔。」

而幾時都話做一名功夫演員，除了要展示打得之外，仲要記對白﹑表情等等，辛苦到不得了。而這個湯曉晨角色就令她不時想放棄嬲自己，仲忍唔住痛喊添：「今晚是個好挑戰，完全考驗我，講真中途都有D挫敗，始終武功底子唔夠好，雖然有上到堂，但係都唔夠，好忟點解自己做唔到，我想完美，想每一個鏡頭都做到導演和武指嘅要求，成日同自己講一係唔做一做一定要做到最好，唔好嘥每一次機會同埋大家嘅時間，而且加上好鍾意今次嘅角色，好鍾意古裝，從來都未試過打，好想做得好，但係明白經驗真係要累積，嬲自己都冇用，嗰刻我淨係諗，不斷專注專注，跌低要即刻調整心理起翻身，忍唔住痛流出來的眼淚要即刻克服，唔俾自己軟弱，原來曹星如講嗰種我已經盡全力喇，係依個感覺，好感恩有咁嘅經歷。」

雖然做打女痛就一定會有，不過如果打得有成就感事實上都是一種收穫，今次傅嘉莉就正正知道這個道理：「雖然而家周身痛，但內心仍然好激動，除咗因為覺得突破自己，真是做到嗰下個滿足感好大，同埋同有共同目標的團隊一齊做嘢超爽同開心，莊監製又不時嚟睇我哋，呢個氣氛會令你好想俾心機去做，愈嚟愈鍾意喺TVB拍劇。總之琴晚嘅感覺真係好正！真心講，全部嘅劇真係好俾心機拍出嚟，每一部誕生真係好唔容易！我會用再多啲嘅時間做好演員嘅功課，湯曉晨，火鳳凰，我會為你加油。 」不少粉絲知道她因為這個角色付出許多時，都紛紛給予留言支持打氣，認為努力會有回報的。