文凱玲發高燒坐車中途肚仔痛 經歷「生死時速」:標晒冷汗!

撰文:吳子生
出版:更新:

文凱玲(Connie)昨晚(21/5)出席在灣仔舉行的電影《婚姻的童話?》煞科晚宴。Connie在戲中與王賢誌是夫妻關係,因為生育問題兩人經常鬧交,對比關禮傑及陳嘉桓兩人有床上情慾戲,大為羨慕:「因為我呢個單元上會有好多喊戲,好記得連續拍咗4日,當中有好多場要喊,喊到個人都有啲崩潰,其實喊到個人都幾辛苦。」

文凱玲(Connie)今晚出席《婚姻的童話?》煞科晚宴。(陳志嵐攝)

此外,Connie透露因淋住雨拍戲兩小時,導致患病發高燒:「其實嗰日係我最後嘅一場戲,之後我病咗成個星期,好慘!有一日我要出外做嘢,當日個人又發燒,燒到103度,個肚又唔舒服,搭緊的士出去做嘢嘅途中標晒冷汗,開口同司機講畀我落車,話我好想去廁所,司機就幫我搵咗個公廁畀我去,完事之後佢再載我去做嘢嘅地方,到我去到做嘢嘅地方,個人都企唔穩,面青青,啲人仲問我有冇事,不過而家好返好多。」