鍾意食譚仔都錯? 蘇施黃:父母唔煮飯畀錢小朋友食啲咁嘅垃圾!
撰文:鄺鈺瑩
出版:更新:
譚仔米線向來都有唔少捧場客,今年2月推出嘅情人節套餐更引起不少迴響。之不過,身為食評人同食家嘅蘇施黃(阿蘇)似乎對「勿演懶肉」極為反感,日前更喺電台節目《大玩派》直指譚仔米線係食壞人嘅垃圾食物……
拍檔主持Choco愛米線 蘇絲黃:害死你哋!
節目中,主持之一嘅Choco表示每次去完外國返到香港之後,第一樣嘢最想食就係譚仔米線,點知蘇施黃聽到之後,反應甚大咁話:「你嘅水準真係好差!」Choco指先唔好評論譚仔米線好唔好食,揀佢係因為「Comfort Food」,結果又引嚟蘇施黃嘅反駁,並謂:「唔好再講,因為真係食壞人……唔係食壞人,我再講一次,對你哋嚟講,你成日話自己有幾健康,我一聽你食呢啲多味精,我就真係一啲都唔OK。對你哋年輕人嚟講,少食屋企飯,呢樣係害死你哋,你出慣街食,嗰啲味唔係味嚟㗎,所以你仲話呢啲係comfort food ,真係大鑊……」
做父母不煮飯 蘇絲黃狠批:對小朋友冇興趣唔該唔好生!
另一位主持人Tristan似乎都唔同意譚仔米線係「Comfort Food」嘅講法,仲話:「可能係上一代,生你哋嗰啲係咪錯咗啲嘢!」點解又關爹娘事?!
蘇施黃接力解釋:「我成日都話如果大家冇時間、對小朋友冇興趣,又或者唔係好夠錢使,唔該大家真係唔好生仔唔好生女,唔係講笑,大佬你又要生個仔生個女出嚟,又唔湊佢,飯都唔煮畀佢哋食,然後畀錢佢落街食埋啲咁嘅垃圾食物,以後就係咁垃圾落去。」
蘇施黃話自己每次去完旅行,返到香港最想就係飲湯,並認為呢啲先係「Comfort Food」。又即係咁,其實每個人對「Comfort Food」都有不同的定義,但蘇施黃就似乎想強制別人對「Comfort Food」嘅選擇,最後更勸Choco將來結婚後要諗清楚先好生小朋友,似在暗示對方好有可能係一位會畀小朋友食「垃圾食物」嘅父母。