江𤒹生（Anson Kong）3月31日驚喜現身尖沙咀鐘樓，為新歌《攬緊處理》進行快閃宣傳活動，向途人大派飛機欖，吸引大批「生粉」（粉絲暱稱）到場支持，場面熱鬧。雖然派發時間僅15分鐘，已引來大量途人圍觀，氣氛熾熱。快閃期間，18歲生粉大膽挑機大嗌「AK叔叔」，AK隨即霸氣「查牌」睇學生證，事後搞笑認輸並落閘拒封大叔：「叫返我做𡃁仔都冇所謂！」

這次快閃活動別具心思，AK與團隊特意選用飛機欖作為禮物，取其「欖」字諧音，呼應新歌《攬緊處理》的主題。被問到兒時有否品嚐過這款懷舊小食，AK笑言：「我冇食過，細個都冇見過，因為我咁後生。」再次鬼馬回應隊友Tiger提及的MIRROR 「30歲顧慮」言論。

18歲少男掏出學生證反擊江𤒹生

活動期間，一名18歲「生粉」大膽向AK挑機，取過飛機欖後，說：「多謝AK叔叔」，令AK即時拿出手機回應：「邊個叫叔叔？睇學生證！」得知對方真是18歲後道：「你贏！」場面搞笑。事後問到AK會否接受被叫叔叔，AK故作認真地回應：「俾人嗌叔叔我覺得幾多歲都唔接受，大家叫返我Anson Kong，或者叫返我做𡃁仔都冇所謂。」回應貫徹AK的霸氣與親和力。

相隔多年再次舉辦快閃活動，AK相當享受，好像即場與「生粉」互動，回答新歌與MV的幕後花絮，不少「生粉」更關心AK是否已出糧給MV中出鏡的愛犬「猜柴」。AK笑說：「快閃好耐冇做過，好好玩，希望遲啲有機會再做多啲，因為快閃可以親近啲大家，雖然每次時間都好短。」他又預告，身上印有「做乜攬」、背面為「攬緊處理」的洗水T恤，將推出相關挑戰活動，呼籲粉絲留意其社交平台，緊貼最新動向。