「霸氣」牛肉麵店設5粗口規條　嫌慢趕時間免問　老闆：只留好客

好客之道，原來並非一定秉持「客人永遠是對的」服務態度。「霸氣」老闆、人稱鬍鬚仔的李恩鑑兩年前在大埔開牛肉麵店，取名「好難食麵店」兼以不招待麻煩客人作招徠。
李今年再下一城，4月起先後在九龍城及旺角「插旗」開分店，最為霸氣舉措更是在大街豎起五大規條招牌，以粗口字句開宗明義不招呼「嫌貴、嫌慢、嫌少、趕時間、囉囉唆唆」的客人。趕客嗎？他爽直道：「唔係嚇人，我要留嘅係好客」。

旺角上海街最近迎來一間「霸氣」小店。店鋪外豎立「五不招待」招牌，「嫌貴、嫌慢、嫌少、趕時間、囉囉唆唆」的客人恕不招待之餘，更輔以粗口大字解釋規條，人稱鬍鬚仔的老闆李恩鑑，自信滿滿地直言：「做生意唔係一定你揀我，我都可以揀你!」

遇「對牛彈琴」客　不敵沙嗲牛肉麵
30幾歲、留有羊咩鬚的李恩鑑，早於2015年大埔廣福邨開鋪，名為「好難食麵店」，當時早已設立規條拒絕招待麻煩客，以奇招吸客。

如今鬍鬚仔坦言，舊鋪遇過有人刻意挑戰，亦有「對牛彈琴」的客人，認為用料90元一斤的美國牛肉麵，竟不及一碗普通沙嗲牛肉麵，指貨不對版。對此，鬍鬚仔甚為勞氣說：「你個人都唔識食嘅，同我講咩要求同水準? 咪對牛彈琴……仲要浪費我碗嘢。」

做少一個客  還有十個等光顧

客人催促，同樣要不得。鬍鬚仔指，客人食慣為時5至10分鐘快餐，櫈未坐暖，就大叫「老細可唔可以快啲」；又會嘮嘮叨叨抱怨廚房出菜慢，他斷言一定送客，「做少你1個，我後面仲有10個，驚咩啫！唔好影響其他人客心情。」

他再向這些客人贈言，「老細，人生苦短，匆匆數10年，食餐飯點解都要趕時間? 你用5分鐘10分鐘食碗飯，真係會消化到咩？好易cancer㗎！」

粗口招牌「貼地」   目標十年內機場開分店

開鋪對食客有要求，但為何今次招牌要用上粗口字句強調？鬍鬚仔認為，旺角龍蛇混雜，粗口才是「貼地」語言，招牌並無不妥，食客更樂於在店內講粗口。他頭頭是道地解釋：「旺角、旺角，全香港只有一個旺角，咩人都有，我係旺角對住講粗口嘅人多過對斯文人，落粗口有咩特別？可能你眼中覺得特別。」

旺角分店將於下周一（22日）正式開業，鬍鬚仔指，新店會提供小菜又會售賣魚蛋；湯底亦加入藥材如北芪、蔘、淮山杞子、紅棗及龍眼肉等「迫出牛肉味」；未來幾個月，店內又會設電源插頭供客人充電，實行以人為本。

談到目前最大心願，鬍鬚仔即雙眼發光，並指希望10年內於機場開分店，「機場international呀嘛，國際級，自己都希望自己品牌可以去到international，俾多啲人知唔好咩?」