【萬梓良】電視劇套套做好人 電影角色Tony哥Peter朱個個賤到暈
自從深宵時段重播《流氓大亨》後，大家又再次掀起煲劇熱潮。飾演昌哥的萬梓良，是個顧家愛家人的好大佬，對細佬妹的無理要求都一一順受，就算得知自己原來並非親生，對「阿媽」李香琴都依然疼愛有加，堪稱好人之人辦。
萬梓良好戲就大家都知，但有趣係佢喺電視圈專做好人好仔，入晒屋，但去到電影界就判若兩人，《英雄好漢》跟周潤發反目嘅勇哥、《旺角卡門》中對張學友處處刁難的Tony哥，仲有《賭俠大戰拉斯維加斯》中，嬲到要燒人Spring Pocket的Peter朱，個個都賤到入血，但又演得過癮，一一都成為電影史上惡人的經典。
《旺角卡門》Tony哥
萬子在《旺角卡門》中飾演的Tony，可謂由頭惡到尾，在社團入面因為搵到錢，下下聲大夾惡，加上張學友飾演的烏蠅不時在他地頭搞事，令Tony事事都針對佢跟劉德華，就連烏蠅擺街邊賣魚蛋都要搞到佢無得撈。一直都惡到盡，但直至烏蠅自願為阿公做死侍入差館殺污點證人，立刻就變得「身嬌肉貴」，冇人敢郁佢一條頭髮。他更大搖大擺去到麻雀館找Tony晦氣，要在他的手下前盡情奚落，並成就烏蠅哥最經典畫面「吔屎吖！」事實上，這一幕如果冇萬子之前鋪排的賤去助燃，根本造就不出呢句對白嘅震撼！
《賭俠大戰拉斯維加斯》Peter 朱
這個是萬梓良電影演出中另一經典，戲中飾演的Peter朱，專搞豆腐渣工程掠水，然後再潛逃去賭城歎世界，而賭俠阿King（劉德華 飾）與阿叻（陳百祥 飾）就奉中國官方高度指示，前往去捉拿歸案。如果Tony一角叫張狂，咁Peter朱就係癲狂。角色性格賤格，但說話卻又非常抵死，就好似他正想跟女伴交歡時，被下屬撞破，他就以一句︰「阻住人哋X嘢，死咗會俾人燒X袋㗎！」都未算，因為佢突然之間醒起下屬係外國人，要立即譯個英文版佢聽，於是就有了「Spring Pocket will be barbecued」這句經典對白，真係搞笑到癲！
《古惑仔》系列 蔣天養
當日睇《古惑仔》電影系列時，看到任達華飾演的蔣天生去世後，都擔心過到底可以搵邊個去頂替呢個角色，又不失霸氣，結果萬子哥飾演的蔣天養不負眾望。至於演繹方面，蔣生一角話晒係社團話事人，所以行徑方面會比較正經，言談亦大體得多，不過那份威嚴就依然不減。尤其第五集，跟陳浩南在遊艇大談97後的黑社會發展，就更見他是個有腦有勇有謀的領導人，亦看出萬子另一種演技。
《今晚打喪屍》牛榮
萬子最近期的作品《今晚打喪屍》，電影被大部分人評為不濟之作，內容不明所言，不過戲中兩位老戲骨萬梓良及吳家麗的演出就非常出色。二人合作多年，走在一起火花便在，而萬子飾演白只的爸爸，因為犯事入獄而未有盡爸爸責任，於是極力去修補，只可惜一切都為時已晚。萬子的演出是有種舊式父親的威嚴，但又想學習時下父子，坦白相處卻又得不到回應，是演得非常入肉，亦會替他痛心。演出完全有道光芒，但今屆金像獎未能入圍候選最佳男配角，相信是電影整體欠佳所致。