「御用惡人」黃子揚享受演奸角可：現實做唔到係犯法

「御用惡人」黃子揚曾參演過《逃學威龍》、《98古惑仔之龍爭虎鬥》、《賭俠1999》等經典港產片，令人留下深刻印象。2017年的黃子揚喜獲第三春，與年輕二十歲的內地經理人BoBo結婚，婚後育有一女。

黃子揚早前現身上環出席直播線上團隊簽約儀式，接受《香港01》訪問時表示：「而家囡囡歲半大，湊住佢覺得好過癮，雖然湊住佢都會好攰，但每次見到佢好多壓力都會消除。（會唔會追多個小朋友？）其實我太太佢想，但我就怕搞唔點，始終都係生命，唔係話加一雙筷子咁簡單，係做唔做得成人，我係會有壓力。」

黃子揚演奸角深入民心。（葉志明攝）

被問到會否參與香港電影拍攝工作？子揚表示：「有同晶哥（王晶）傾過，但都會喺大陸拍。其實都係舊年傾，變咗都係等佢哋，始終我做直播嗰度都要開工。（套戲都係做反派？）都係做反派，好似係無間度嗰種，好人又變壞人咁。（做反派鍾唔鍾意？）哈哈，無辦法個樣生得衰。不過做反派喺可以天馬行空，因為現實做唔到係犯法。」