【英超.路斯一分鐘球評】少帥的祈禱 要3連勝還是華拿說明書?
撰文:路斯
出版:更新:
快車過埋今晚,終於停站,有得唞吓,除咗林伯。
上個月頭車仔氣勢勁,追貼榜首。點估到一個快車,跌到第8。噚晚對曼城輸得太樣衰,加埋今季開水喉買「飛機大炮」都用唔掂。冬風起,林伯聞到魷魚味。
車路士喺史丹福橋擺陣,一向有保證,輸還輸,多數係強隊,今季都只係輸畀利物浦。睇賽果,主場輸畀曼城都算正常發揮,但係睇埋過程,上半場一失波,防線受到第一次衝擊之後未驚醒,第2、3球睇波唔睇人,睇人唔貼身。
睇賽果以為曼城「王者魂」覺醒,睇完發覺係車仔低處未算低。季前2億買人,薛耶治Keep住覆診都算,華拿唔慣踢翼要返後,愈踢愈沉,9場聯賽冇波入。夏維斯仲慘,位置成日變,攻中、中鋒、右翼,連「8號位」都踢過,擺嚟擺去,搞咗半季入得1球。
林伯硬頸,大家都知。上季尾Kepa失準又唔聽話,明知卡巴尼路水準大跌,照出。今季馬高斯阿朗素自己上大巴,被方丈判處直入凍櫃。要制衡方丈,要靠油王。車路士高層一向急進,使得錢就要回報。林伯上年帶住名宿光環,受住限買令用新秀搶到歐聯資格,今季要飛機有戰機,要大炮有米加粒子炮,點知畀舊年同一階段攞分少。難怪有傳媒話鑊已開,準備上演「林伯落鑊」。
林伯面面觀:
硬頸少帥前途亮紅燈,正如阿迪達早前處境。阿仙奴領軍主場擊敗車路士,乘氣勢加上微調陣式,3連勝反彈。林柏特遇上眼前處境,強調「重建必有痛楚」。但相對高效的阿巴謙與基奧特長居後備,用來應急「救近火」是咪有得諗?林柏特,又有冇咁諗?
英超第17輪戰果(按圖放大):
+3