大埔宏福苑上樓安排進入第二輪最後一天，今日（25日）繼續是宏昌閣和宏仁閣的居民上樓。其中住宏仁閣高層的麥生麥太感恩安全走出，但所有物件也留在屋內。麥太明言單位損毀不嚴重，意願是維修後再入住，但事與願違，哽咽道：「好無奈，我哋嗰條根種咗喺度，你（政府）要連根拔起呀！」

早上8時半，陸續有居民登記後上樓，各人有備而來，大背囊、帆布袋和手拉車等。其中住宏仁閣25樓的麥生麥太偕家人到場，麥太身體狀況不許可，不會上樓：「我都無能力上，爬上去咩？驚一陣要人抬我落嚟，費事累佢哋呀！」她希望家人代為檢回結婚戒指和結婚相等等。

麥太指其單位損毀不嚴重，希望返回入住：「我哋無爛無剩，你（政府）整返好畀我哋，係願意返去住，但問題政府肯唔肯做？佢唔肯做我哋都無計呀！」她含淚說：「我哋嗰條根種咗喺度，你要連根拔起。無計，好無奈！好無奈！我哋係唔想同佢（單位）告別。」

她續稱：「依家一刀切，推我哋去第二度。公屋揀樓都有三次揀啦！依家乜都無得畀我哋揀喎，樓層唔知、方向唔知、高度唔知，售樓書咩都無，點揀？點畀個業權你吖？」

同行的丈夫麥先生撐住拐杖、右腳戴上護膝，但也要上樓執拾。他說：「盡力啦！膝頭唔好，但唔上唔得，啲後生唔知啲嘢放邊，一定要有一個上去。」為此他每隔日練習上落10層樓梯。

對於住了40多年的家園，麥生深感不捨，直言：「告咩別？我屋企嚟㗎，點會告別！」他相信今次並非最後一次上樓。他又認為3小時不足夠執拾：「多一日都唔夠，我覺得（今次）唔會係最後一次，太多人要求上多次，事實無可能一次攞晒啲嘢走，時間又短。

至下午1時左右，麥先生完成執拾落樓，他坦言情況比想像中好：「係隔鄰燒咗，影響到我哋個廚房廁所，房同廳都無問題，不過係黑，好多塵。搵得返銀紙、有舊金、金手鏈、耳環、戒指同衫褲鞋襪。」

他指3小時並不足夠，只能選取具紀代性的相簿，包括自己年輕時的相片和子女幼年的相片，而子女們來回25樓四五次之多。他批評當局不安裝電梯：「點解唔整返架電梯？要我哋啲老人家咁樣。唔好話三架，一架都行少好多，都唔肯做，係咪咁困難？！」

就昨日（24日）上樓的住戶，進出大廈的平均時間是2小時28分鐘，最短的是20分鐘，最長的是3小時52分鐘，總共上樓的戶數是114戶、413人，當中有61戶129人上落大廈不止一次。