《阿媽有咗第二個》首預告　柳應廷呷阿媽醋對白句句針對姜濤

由彭秀慧執導，毛舜筠、姜濤、柳應廷（阿Jer）主演的《阿媽有咗第二個》，今日（1/6）公開先導預告，如果你昨日買唔到MIRROR飛好唔開心？今日睇番條先導預告補番，笑番下，阿Jer仲有驚喜演出。

電影《阿媽有咗第二個》，早前入圍第十七屆大阪亞洲電影節競賽項目，亦奪得芝加哥亞洲躍動電影節「觀眾票選獎」，成績驕人令人期待。今日電影發出首條預告，講到飾演阿媽的毛舜筠決定出山做經理人，而睇中的竟正是做茶餐廳伙記出身的方晴（姜濤　飾），而阿仔子軒（柳應廷 飾）就大呷阿媽醋，顯得不滿，言語間處處針對姜濤。

預告所見，阿Jer飾演的子軒，對阿媽出山顯得極為不滿，而對阿媽邀姜濤一齊同住更加是矛盾源頭，造成二人在「同居」下處處針鋒相對。例如姜濤介紹自己是做茶餐廳，阿Jer一句︰「睇得出！」單打直落。最好笑是姜濤邀阿Jer唱K，阿Jer唔多賞面地秒回︰「我唔識，你唱吖！」如果代入真人身份，呢句對白喜感十足。電影暫未有上映日期，不過預告一出已令人期待。