【果欄‧黃浩然‧專訪一】因為患病令他轉變：以前我係唔注重休息
《果欄中的江湖大嫂》是黃浩然今年的第二部劇集，其實今年他已經開始減產，除了因為要兼顧家庭之外，最主要的原因是因為他曾經患上了「貝賽特氏症」，導致喉嚨發炎潰瘍，視力模糊。亦因如此，他開始醒覺家庭比工作更加重要，由以前的一頭牛變成會推工作的黃浩然，更因此把十幾年的煙癮戒掉，過程還相當輕鬆。
在2014年，黃浩然被確診患有貝賽特氏症，亦因此將《張保仔》男主角之位讓給了洪永城。他曾經在訪問中說過，自己可以一年開365日工，浩然十分清楚自己在TVB的路，就是用最短的時間拍最多的劇。在入出院後終於明白了一個道理，他說：「以前我係好唔注重休息，搏晒命，收0300會接0630，但係而家我會舉手話唔好意思，我投降喇。當然食嘢都會小心咗，開劇都會帶吓飯，亦都戒咗煙喇，理論上而家身體係好咗好多。」
人人都說戒煙有多難，不過在浩然的字典裡，看來並沒有「難」這個字詞，反而是輕鬆的，他說：「話戒就戒，病完喺醫院出返嚟，第一枝煙無食就無再食，戒咗3年幾。件事就好怪嘅，嗰陣喺醫院，已經無生命危險㗎喇，我老婆就同我講出咗院唔好咁快食煙住，因為嗰陣個胃有啲事，出咗院要食返一個月藥。我老婆就話，等我食晒藥先好食煙，其實嗰陣我都無乜特別想食，因為個口腔係爛晒，所以我就答佢好喇。」
由1997年拍攝《十萬火急》而入行，浩然表示自己已經吸煙18年，當一日要做20個鐘，平均一個鐘頭1枝，1日除時可以食足1包煙。「咁話說好返喇，食晒藥，要返公司做一啲配音工作，我心諗正呀可以食煙，真係咁㗎，好似細路仔。通常我哋返到公司，泊低架車就去飯堂出面食煙，我老婆喺我出門口前就同我講返公司唔好食煙住，我就話吓唔係一個月後你俾我食咩，真係好似細路仔咁。之後我一路揸車就喺度諗，其實係咪可以唔食呢？咁到我返到公司喇，你知食煙嘅人㗎喇，啲煙同火機，車又有，背包又有，我嗰吓就試吓唔食喇。咁就入到廠，見到啲同事，你知佢哋喇，問我一句有無嘢呀就成包煙遞過嚟，我就話我無食喇。」拒絕了第一支煙，一直到現在三多年，浩然再也沒有抽過一口煙。
不過其實浩然戒煙都有一套理論，他表示：「其實嗰刻我無諗咁多，純粹係唔食，無乜特別。但其實頭嗰半年我都keep住個袋有包煙，我唔係迫自己戒，出面啲人話煙好難戒，我又真係ok，so far戒到，我覺得可能食緊嗰陣戒係好難嘅，但我住醫院都住咗個幾月，咁你順理成卒章無咗嗰樣嘢，即日如果你今日食緊叫你聽日戒係唔容易。喺醫院經歷口腔爛晒，個人又康復喇，又無煙味，個人好似乾淨咗咁，可能因為咁喇。」各位有心戒煙的人士，不妨把自己跟煙隔離一段時間，可能好快就戒到喇！