韋家雄特意回兒時舊地影婚紗相:返當日住嗰個門口影張相俾媽咪睇

撰文:吳子生
出版:更新:

今日是53歲韋家雄的大喜日子,迎娶比他年輕近廿年的女友鄧楚雅(Keynes),韋家雄一早就與兄弟團出發去接新娘,途中當然要接受「玩新郎」的命運,不過韋家雄就表示自己過關無難度,即使要受罰也有一大班兄弟幫手撐住。

恭起晒家雄。(黃國立攝)

在接受《香港01》訪問時,韋家雄被問到有否緊張,他說:「開頭覺得唔會緊張,但原來到咗嗰日真係會緊張,我噚晚瞓得個幾鐘,老婆直頭無瞓過。(玩新郎?)佢哋對我都好狠吓,仲話我答唔到問題要食wasabi嗰啲嘢,啲問題都唔係關係佢(老婆),好過份㗎,物理學又有,外母幾時生日咁,中晒招。好在楊明幫我食咗1條wasabi,個個兄弟都有幫手,好似好好食咁,個個搶住食。(仲有無咩要做?)要跳大媽舞,開門利是就盡量少喇,我睇過警訊,好多人喺呢度瀨嘢,所以我無出事哈哈,都係心意喇。」

好在有班兄弟幫手!(黃國立攝)

而韋家雄的婚紗相也是別有心事,特意返回兒時長大的地方,亦為媽媽完成了一個心願:「嗰度喺我細個長大嘅地方,我住到10歲,同埋係我覺得最開心嘅地方,細個一大班朋友周街走,所以返番去。同埋我媽咪都好鍾意嗰個地方,我去返當日住嗰個門口影張相俾媽咪睇,隔離大部份都搬走晒,但對面屋竟然未搬走。嗰度好好風水,可能發哂達走晒。」

好sweet呀!(黃國立攝)
+21