【酷熱街市】大圍街市冇冷氣 公認全港最熱:雞都唔知暈咗幾多隻

撰文:陳芷慧
出版:更新:

「你幫我爭取到有冷氣,我就接受你訪問。如果唔係,你唔好問我,你問啲雞。」大圍街市一個活雞檔老闆娘絕情回應,記者無奈敗走。2014年食環署徵詢大圍街市170檔檔主安裝冷氣的意願,有86%的租戶表示支持,可惜至今仍未動工。大圍街市冇冷氣,通風差,室温34度,比其他通風較好的街市如九龍城市政大廈,高出兩度,檔主躁底理所當然,「啲雞都唔知暈咗幾多隻。」然而,政府規管的街市,租戶不能夠私自安裝冷氣。

街市冇冷氣,辛苦過以前棚仔

温度計硬繃繃的數字,不足以具體形容街市的熱。燒臘檔阿姨說「我5歲就落田,呢度仲辛苦過割禾」;從前在九龍城棚仔賣豬肉的檔主:「𠵱家仲辛苦過以前棚仔。」全球暖化,這兩年明顯更悶侷,他下決心花四千蚊添置一部大型通風機,搬運工人經過都停在風口前拉低衣領,吹涼濕漉漉的胸肌;同樣在燒臘檔工作的李生:「講慘,燒臘檔唔係最慘。」即指着隔鄰豬肉檔,說:「街市冇冷氣,最慘就係豬肉檔。」

肉檔有風扇唔開得?

這街市豬肉檔十居其九自設風扇卻不開動,豬肉檔檔主李先生:「開風扇咪吹到啲豬肉乾晒喇。」他唯有感受那想像出來的涼風,「點樣會涼啲呢,望住風扇就當涼咗㗎喇!」他說,夏季每天至少壞掉10斤豬肉。「一斤豬肉44元,10斤就440元,每日我都係做5000蚊生意。」豬肉檔檔主為免豬肉變壞,會頻頻把豬肉輪流放進雪櫃,「呢批攞出嚟擺一陣,又雪返入去,又攞另一批出嚟擺賣。」尤其中午時段,定必要把豬肉放回雪櫃。

+1

豬肉每隔半小時放回雪櫃

而豬肉放雪櫃的次數、豬肉變壞的多寡,某程度上反映街市通風優劣。記者走訪大窩口街市與大圍街市,兩個街市同樣冇冷氣,前者豬肉檔每隔兩小時將豬肉放進雪櫃,冇變壞;後者每隔半小時一次,仍有幾斤肉變壞。站在大圍豬肉檔與檔主閒聊,李檔主邊說邊檢查架上的內臟,「喇,呢個豬肝要掉,開始變色,唔光身。要成日check住㗎,比咗客人食就大件事。」然後,一臉無奈把豬肝拋進垃圾籮裏,頭也不回。他說全隻豬最能賣錢的就是梅頭肉,「壞咗就真係肉赤。」

「唉,呢個街市講裝冷氣,講咗好多年。」對面凍肉檔主搭訕道。她說四年來,每年議員、食環署都說在跟進,「講到我都麻木。」豬肉檔主李生做過不少街市,楊屋道、荃灣街市、順寧道街市、馬鞍山街市,去年始租下大圍街市的檔口,「最辛苦、最熱、最差就係呢個大圍街市。起初唔慣,太熱,流太多汗,全手臂長滿紅疹。」又有另一位行家,在粉嶺華明街市賣豬肉的陳檔主,手臂上滿佈的紅疹已成不腿的疤,「就係熱到成日敏感。」「我哋做咗30年豬肉檔,有咩街市未做過,最熱一定係以前第一城街市同大圍街市,未行到入去已經出汗。」陳檔主說。

點解大圍街市裝冷氣咁難?

大圍街市1985年啟用,2014年食環署才徵詢大圍街市商販,有86%租戶表示支持街市加裝冷氣,惟兩年來仍未動工。工聯會新界東辦事處總幹事鄧家彪於本年四月與食環署職員會面,鄧當時引述食環署回應指,街市將於本年底動工,預計2020年完成。鄧家彪接受《01社區》訪問更新食環署為大圍街市加裝空調的進度,「進展中,但年底開工,冇可能。」他解釋大圍街市加裝空調遲遲未能動工,主因是街市位於私人屋苑金禧花園地下,要先與業主立案法團磋談。計劃並將於本年下半年度提交沙田區議會,由於項目預算超過1億,亦需交由立法會通過,「期望2018年上半年能在立法會通過,攞咗錢,明年下半年就可以動工。」

有商販表示期望工程能分階段性進行,以免斷去生計,但食環署擬關閉整個街市,為免拖慢工程進度。食環署預計工程最快能於8個月內完成。現時大圍明渠正在興建兩個足球場,即將完工。鄧建議街市施工期間,政府可安排商販於足球場上作為臨時街市。

飲水飲到胃痛

記者問李檔主:「冇冷氣你都租呢度?」李:「我想㗎?馬鞍山街市領展唔租比我,就得返呢個位有空檔。」他說這個檔口之所以招租,全因是大圍街市的「死位」,「呢度成日有人走嚟度温度,夏天最熱就係呢個位,至少都有34度。今年試過最高有38、9度。」肉檔檔主基本上日飲4公升水,甚至有檔主說從前喝得太多礦泉水,影響胃液分泌而胃痛,才改喝烏龍茶。豬肉檔位於大圍街市側門近出口的位置,對面是凍肉檔,凍櫃熱氣無情地吹向豬肉檔,「隻腳好似有暖爐咁。」,李檔主兩點上班,「如果要換,每日要換四件衫。」語罷,隨即用那戰績斑斑的圍裙抹掉臉上的汗。去年手臂長滿紅疹,如今皮膚猶如長了抗體。「用手巾,我點做嘢啊妹。」年輕伙記即有感而發:「我六點鐘開工,到𠵱家三點,我件衫冇乾過。」開水喉,水是熱的,「要長開一個鐘,啲水先凍,我點可以用水沖洗豬肉。」然而,側門向北,「冬天我要著羽絨斬豬肉。」李檔主說。