《全民造星》大熱Lyman（香胤宅）成功打入十強，不過對於已婚嘅佢嚟講，相信唔少觀眾都會好奇佢之後嘅發展路向？「一直都有同太太傾嘅，我哋都係open to返嚟香港，如果有工作機會的話。」同樣係海外參賽者嘅Ash Lu(盧信宥)即時舉手話要做鄰居。「到時煲啲湯畀我飲。」

雖然《造星》已經去到第5季，不過Ash就好坦白咁話一直冇留意，直到同鄉廖子妤向佢提議，但由於當時爸爸嘅健康狀況，加上本身已經出道，所以一直心大心細。「我19歲入行，當時真係咩都唔識，係咁衝。如今有機會再嚟一次，將自己一直以嚟所學到嘅呈現畀大家睇，所以同屋企人商量之後，佢哋都好支持我畀多次機會自己。」

曾在美國參與百老匯音樂劇《芝加哥》巡迴演出，因疫情關係而重拾教跳舞嘅工作，Lyman亦都好坦白咁講《全民造星》4粒字都係最近先識讀，當初老婆向佢提議《造星》時，連報名表格都係靠對方解讀。「佢真係幫我好多，佢叫我睇多啲周星馳、周潤發嘅戲。我又冇話擔心啲咩，因為如果你有信心去完成一件事，喺邊都可以，就算將來我要喺非洲生活，Lyman嘅表演藝術方向都唔會有任何改變，唔會因為喺香港而覺得特別辛苦，唯一要適應係語言。」

對於自己嘅中文程度，Lyman笑言應該連幼稚園都不如，Ash即時踢爆佢成日睇卡通學中文。每次有小隊對決，比起排舞，Ash同Lyman花最多時間在發音，最「搞唔掂」一次係《創作者的派對》，而至今仲笑緊嘅係《大師班｜Master Class》，Ash解釋當初只係有主題「和而不同」，但一直揀無心水歌曲，直到發現《Master Class》。Lyman補充「每個意見我哋都覺得好好，於是砌砌下，就有少少……Spaghetti，but it was fun！如果唔計表演的話，我最感謝嘅係有呢啲朋友，雖然到今日我哋都仲笑緊，但呢個都係好好嘅一課：it’s ok to fail。」Lyman嘅另一個課題，應該係熟悉Social Media，他之前在IG發帖因非常有禮貌地加上「dear」及「your sincerely」，被fans笑他似寫信。「所以我出po而家係會需要多少少時間。」