【C9特工】高海寧擔任新劇女一 拍住民間視帝做特工
撰文：梁子健
出版：更新：
TVB「咪神」多的是，但能夠上位做女一的就寥寥無幾，除咗高Ling高海寧，事關佢將會擔任新劇《C9特工》嘅女主角，更被「奧運六星」中嘅其中兩粒星拱照，亦即係由馬國明及黎諾懿榜住佢上位。
+19
其實高Ling升lv做女一已不是第一次，事關早喺《C9特工》之前，據知高Ling已經伙拍楊明、黃德斌等，擔正《婚姻合伙人》一劇嘅主角之位。可惜，《婚姻合伙人》由2017年上旬拍完後就成為倉底貨，至今仍係播出無期。
上一部擔正嘅劇都未播出，觀眾反應係好係壞都未知，但高Ling話咁快又可以做女主角，今次仲有民選視帝馬國明，以及觀眾緣極好嘅黎諾懿「撐場」，被力捧程度可想而知。究其原因，網民都認為係多得殼王陳國強及王晶帶挈，更有網民替馬國明唔抵：「睇個劇名就知膠膠地，馬明又被逼拍膠劇喇，TVB真係相當『厚待』佢。」
《飛虎之潛行極戰》於優酷的播放量超越20愈，而高Ling在當中飾演O記督察。(IG圖)
其實大家又唔使諗到咁灰兼「未審先判」嘅，話唔定高Ling表現可以令觀眾眼前一亮，而馬國明又可以延續《降魔的》嘅人氣繼續受歡迎呢，再唔係抱住馬季（《降魔的》馬國明飾演的捉妖角色）同SAW（電影《恐懼鬥室》）呢一點去睇套劇，都不失為一個相當吸引嘅賣點。總之，大家放長雙眼拭目以待就肯定無錯啦。