何嘉麗怒斥鏞記不尊重食客　「啲燒鵝唔好係咁切頭切尾俾我食啦」

何嘉麗閒時鍾意享受美食。

香港電台DJ出身又曾經做過歌手出過唱片的何嘉麗，當年與鄭丹瑞以及林珊珊組成的「三個小神仙」DJ組合而為人所熟識，曾經離開娛樂圈的她近年亦有回歸電台主持節目。日前她於她的Facebook專頁分享了一件令她很生氣的事，貼文一開始寫住「我今日簡直覺得係俾鏞記羞辱！」引起了大家的關注。

這篇發文講述了她於鏞記用膳的不快經歷，內容講她到該店幫襯，點了一碗價值港幣100元的招牌燒鵝麵。不過當她一見到碗燒鵝麵時，即刻「火都嚟埋」，因為她發現整碟燒鵝的皮是不同顏色的，代表了是來自唔同部位之餘，亦都可能是來自不同的燒鵝拼砌而成。她表示：「咁斬鵝就梗係拼砌㗎啦！你話。問題係呢啲擺到明就係啲肉頭肉尾，呢度一忽嗰度一片咁砌成！大佬，$100，你可能覺得唔係乜嘢錢，但係都請你尊重下我，俾返舊齊齊整整嘅肉我啦！」

她認為該店此舉完全是妄顧食客的感受，並表明不會再幫襯：「埋單$130，包括$12茶錢連加一。我重申， $100一碗燒鵝麵，我覺得合理嘅，但係請你尊重下我，亦都請你尊重下你自己個老字號，唔好係咁切頭切尾俾我食啦！至少有兩三塊肉係左鄰右里都好呀！不過算啦，講咁多做乜，都唔會有下次！」而不少網民都紛紛留言，有人話都試過類似經歷，亦有人話根本無明文規定一碟燒鵝肉要來自同一隻燒鵝。

至於鏞記方面就表示同一隻鵝受熱程度不一樣，所以燒鵝皮會有機會因而顏色不一致，亦不排除為了食物的品質而選取兩隻燒鵝的不同部位給予買碟頭飯或麵的食客，但若是買整隻、半隻或例牌燒鵝的食客，則會保證所有鵝肉是來自同一隻燒鵝。