謝安琪《偷情的禮儀》致敬90年代是巧合 馮穎琪:創作非為追潮流

撰文:
最後更新日期:

資深作曲人馮穎琪及資深填詞人周耀輝創辦的「一個人一首歌」,舉辦《埋班作樂》招募36位本地新晉作曲、填詞、編曲創作人接受培訓。今日舉行啟動禮獲一眾歌手現身支持,包括:Miss Chan Chan陳潔靈、盧巧音、6號@RubberBand、布志綸、陳柏宇、陳健安、泳兒、鍾舒漫及鍾舒祺、湯駿業、鄧小巧、小塵埃、ERROR等等。對於樂壇「青黃不接」、「樂壇已死」等批評馮穎琪斬釘截鐵說:「我緊係唔認同啦!因為我自己係一份子,如果『香港樂壇已死』,咁我咪死咗!如果我死咗又點會繼續有作品出現,仲有人聽我作品呢?所以呢樣嘢係唔成立嘅!」馮穎琪又分享了謝安琪《偷情的禮儀》是無心插柳地向90年代致敬,《the album and the rest of it ...》變成一個復刻計劃也是一個微妙的巧合。

香港樂壇已死? 馮穎琪:呢樣嘢唔成立!

《埋班作樂》計劃志在培育新一代音樂人,並擔任與大眾溝通的橋樑,展示新一代本地音樂的面貌。對於大眾不了解,並批評「香港樂壇已死」,馮穎琪斬釘截鐵地否定:「我緊係唔認同啦!因為我自己係一份子,幾年前有人話『香港樂壇已死』,咁我咪即係死咗!如果我死咗又點會繼續有作品出現,仲有人聽我作品呢?所以呢樣嘢係唔成立嘅!」

她與周耀輝合作發起《埋班作樂》,因為二人價值觀相近,鍾意問「點解」:「我同耀輝嘅價值觀好似,係要問『點解唔做』,而唔係純粹跟從。我哋喺度檢視呢個樂壇爭啲咩,唔係淨係講企最前嘅歌手,而係成個工業由創作而起。做咗咁多年創作人我覺得,當啱嘅歌手同啱嘅創作團隊,火花係咁樣嚟,並非一個人嘅功勞。」所以今次《埋班作樂》集合跨世代的歌手及音樂人,最年輕的是2000年出世,希望勇敢地為樂壇帶來新氣象。

「香港樂壇已死?」在馮穎琪眼中這件事絕對不成立。(陳順禎攝)

音樂工業不應只得一種模式創作 馮穎琪:咁永遠都係跟隨別人步伐

身為作曲人,馮穎琪對音樂工業的做法有自己的見解,她亦希望令行業更多元化,她提出:「入行咁多年,好多時唱片公司話要首點嘅歌,然後畀個reference你參考,其實我接受嘅,因為工業有工業嘅模式。但呢個只係其中一個模式,如果係全部都係咁,即係我永遠都係跟緊人嘅步伐,有冇我哋本地元素可以放入去呢?」

有見及此,《埋班作樂》集中創作廣東歌詞,因為廣東話就是代表本土文化,同時提供空間予新晉音樂人大膽創作。

馮穎琪與周耀輝價值觀相近,所以他們正式埋班,希望培育樂壇新血。(陳順禎攝)

歐美、香港寫歌方式大不同:廣東歌旋律更細膩!

馮穎琪又提到,香港、亞洲各地以及歐美的作曲人思維很不一樣,廣東話的九聲雖令創作難度增加,但同時亦最獨特。她解釋:「最明顯就係廣東話有九聲,扭好少音都會變成另一個字,所以香港人創作旋律會密集啲、細膩啲;比起歐美,佢哋可能好groovy(律動感重),或者同一個字可以拉好多個音,但係廣東話就唔可以,如果咁做好可能會變成粵曲。」香港音樂人可做的是,融合本地思想以及外國進步的科技,結合成新一代本地音樂。

歐美與香港的音樂人創作思維很不同,馮穎琪認為廣東歌的旋律更細膩。(陳順禎攝)

《偷情的禮儀》致敬90年代係無心插柳:冇同Juno夾過㗎!

謝安琪日前在「十大中文金曲」上奪最優秀女歌手,她提到:「令自己心跳冒汗的創作才能觸碰人心。」原來馮穎琪也是同路人:「其實我就係一個咁嘅創作人,真係會搞到自己心跳冒汗!對我嚟講,我鍾意做到係突然間挑起情緒,令人毛管戙一下;或者令聽眾留耳仔好似有啲嘢發生,但分析唔到係乜,有時聽眾就係需要呢種刺激。有時一粒音嘅改變,或者節奏上轉變已經做咗。」

馮穎琪又提到,雖與謝安琪相識多時,以往卻未曾正式合作過,所以今次合作交出一些很想謝安琪演繹的作品。不過,事前未有與麥浚龍夾定,可謂偶然遇上的驚喜。她說:「Juno以前畀方向我係講到好仔細,例如要『死唔斷氣』、『唱唔到』,但今次佢係叫我放心寫。事前完全冇夾過,我亦唔知佢哋最後會做一個90年代嘅企劃,都唔知係咪因為有我嘅投入令佢呢個想法,創意就係咁有趣,可能係互相帶動一啲嘢。」

謝安琪《偷情的禮儀》帶有復刻90年代廣東歌的味道,但原來馮穎琪創作時是無心插柳。(MV截圖)

點擊睇更多謝安琪靚相!(按圖放大)(資料圖片)
+5
+4
+3

創作人並非為追潮流而創作:旋律係冇時間性

馮穎琪分享自己創作的心聲,她很想寫歌給一些在她成長的年代的前輩女歌手,雖然現時未寫到,但可以將那份歌曲中的氣質放到現時的作品之中。她說:「好多人問我《偷情的禮儀》係咪十幾年前寫㗎,我話唔係;反而寫畀安仔(陳健安)嘅《在錯誤的宇宙尋找愛》就係十幾年前寫定,好多人都估唔到。所以,創作人腦海入面,旋律係冇時間性,我哋唔係為咗追潮流去創作,而係為咗記錄嗰一刻嘅我。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。