【理財】學習極簡主義理財 關鍵:減少不想要的便有餘暇找喜歡的

撰文:
最後更新日期:

不少人覺得理財這會是知易行難,收入有限但物慾無限,像是多多錢也不夠。喜歡在網上分享理財心得,並著有《戒窮》一書的窮生,卻有另一套見解,甚至建議大家可參考日本近年流行的極簡主義,好在減省消費之餘也可在「搵工/生活」之間取得平衡。

不少香港人因為怕浪費和愛收藏,所以令家中堆滿雜物。(資料圖片)

撰文:窮一生

近年極簡主義喺日本開始起星星之火,唔知大家有冇睇過相關嘅文章,無論係一家人定一條友,佢間屋都係好似乜都冇咁,只有最基本要用嘅嘢,仲一定唔會預多。窮生睇咗呢篇報導之後,對極簡主義好感興趣,之後都study(學習)咗唔少,發現當中有啲嘢同窮生嘅價值觀都不謀而合,而當中一啲精神其實都幾適合香港人去了解同反思一下。

現實少少講,極簡主義係好適合香港嘅窮X。原因一字記之曰:細!香港人住都冇地方住,一家三口迫喺一個200至300呎嘅空間並不罕見,我好多時都唔明啲人,明明已經好迫,點解仲要搞到一屋都係嘢?

我同好多身邊嘅人都傾過呢個問題,發生原因主要分兩類。第一就係啲嘢有用怕浪費。好多嘢其實你唔會成日用,當要用嘅時候買咗,又要花空間去放。久而久之,就一屋都係嗰啲好耐都唔會用嘅嘢。

只要分得清楚咩係Need(需要)同Want(想要)。你就會發現日常生活之中有超過一半嘅消費係不必要。(資料圖片)

第二就係收藏同回憶,呢個其實好多人都會有,人喺演化心理學上已經有儲嘢嘅習慣,好大程度上係因為以前生活冇安全感,手邊要有足夠嘅嘢先有嗰種安心嘅感覺。簡單啲嚟講就係心癮,有錢、有時間、有空間,其實冇所謂,最大問題就係當你冇嘅時候仲要咁儲法,會唔會分清楚個先後次序,會令你活得自在啲呢?

極簡主義減少浪費

窮生其實都算係一個極簡主義嘅入門級人士,因為我生活一向簡樸,物慾亦都唔多。窮生生於呢個極端資本主義嘅香港,對消費反而係一啲興趣都冇,行街好難見到有樣嘢我係好想買。老土少少講就係,窮生覺得要分清楚咩係Need(需要)同Want(想要)。只要分得清楚,你就會發現日常生活之中有超過一半嘅消費係不必要。而呢啲不必要嘅消費就令你要加倍地工作,到頭來為咗一樣你冇咁需要嘅嘢,迫自己去做一件你非常唔想做嘅嘢(返工)。

過極簡的外功(減少不必要消費)而得出的內功,就係因為唔需要使好多錢,亦能夠減少不必要工作。(電影《男人唔可以窮》截圖)

極簡主義的「less is more」(簡單就是美)精神

上面其實都開咗個引子,由於奉行極簡主義者消費嘅嘢極少,你成盤數就變得非常易明清楚,思路亦會比之前清晰。因為喺你身邊嘅嘢很少,反而令你更清楚自己嘅目標。唔講咁深,就屋企而言,你會好清楚屋企作用係乜,有啲咩係應該要有而你未有,有啲咩係你唔需要,由物件慢慢推展到身邊嘅事物。

窮生自己發展出嘅精神就係,透過極簡的外功(減少不必要消費)而得出的內功,就係因為唔需要使好多錢,亦能夠減少不必要工作。由自己最不想要做的東西開始慢慢減少,你就可以有餘暇慢慢發展相對比較喜歡的工作。呢個轉化過程,極簡主義能夠幫你較易達到目標。

平時你要20K去RUN(經營)嘅生活,如果你而家10K就可以RUN到,即係話你可以減少一點你的辛苦收入,去發展自己喜歡的收入來源,終極目標是100%喜歡的收入來源。你一日不放棄過度消費,你一日都係行緊一條有錢就得嘅工作之路,如果你可以三至五年搵夠還好,更多的就是「月光」的永恆輪迴。

先透過把自己嘅生活變簡,方便找出自己想要的人生,係筆者覺得目前暫時覺得最有效嘅方法,尤其係香港生活困難,為咗過大家夢想嘅人生,好應該先儲起彈藥for(供給)日後真正嘅夢想。(VCG)

極簡/消費也要了解自己

所謂唔同人活唔同嘅人生,有人可以有個遠大理想,有人只是平凡過生活。遠大理想都有分要錢定唔使錢,如果你嘅理想要用好多錢先得嘅,你必須搵好多錢返嚟RUN你嘅人生,沒有一本通書嘅存在。

不過,了解自己嘅目標係必要。先透過把自己嘅生活變簡,方便找出自己想要的人生,係窮生暫時覺得最WORK(有效)嘅方法,尤其係香港生活困難,為咗過大家夢想嘅人生,好應該先儲起彈藥for(供給)日後真正嘅夢想,對於充滿末世感覺的香港,窮生只能講一句,共勉之。

【作者簡介】
窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。著有《戒窮》一書分享理財心得。

(本文授權轉載自POORLHK,經01職場頻道編輯,原文標題為【極簡主義-窮L快樂的道路】)

立即下載《香港01》,緊貼公務員職位空缺、勞工處筍工推介,了解CV、面試致勝技巧!
下載網址:
https://hk01.app.link/bkbJyY5t4O



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。