網絡文化影響中文 程度分野大 補習名師張欣欣分享小學溫習重點

撰文:鄧煥儀
出版:更新:

疫情以來,孩子的學習著重網課,同時學校亦縮短了授課時數。近年涉獵小學課程的補習名師張欣欣表示,觀察到學生的中文能力受網絡文化影響,疫情後程度分野將更大,家長不能掉以輕心,並建議「做多少少」,以有趣的方式協助孩子維持學習進度,及早預備升中。
攝影:龔嘉盛

網絡文化影響中文

張欣欣近年為小學生提供補習課程,他表示,疫情以來少了學校測驗,令學生的溫書動力減低。「大多數學生覺得成個學習氛圍未變得正常,應付咗而家半日網課嘅需要就算。」然而,部分危機意識較高的家長及學生,則未敢鬆懈。「比較乖嘅,相反係自己睇多咗書。一部分自己學咗好多嘢,另一部分就停頓咗。黑嘅愈黑,白嘅愈白,我估兩三年後就會有明顯嘅差異。」

他補充,疫情期間學生上網的時間增加,網絡文化亦潛移默化地影響語文能力。「第一係文法。網絡鍾意用被動式,例如『水已抽』、『分已袋』,以前唔會有啲咁嘅中文,而家小朋友慣咗咁用;第二係唔想打咁多字,用英文、數字同音字混入中文,例如『C9』、『88』;第三係就係用emoji(表情符號)去表達睇法,例如作嘔,已經有個作嘔emoji,完全唔使用文字。小朋友覺得咁樣都表達到意思,同人溝通到,就唔記得中文詞語係點寫。」

張欣欣建議,家長可利用補充練習來評估孩子的水平,分析弱點。「呢兩年少咗好多測驗,要自己喺屋企小測。首先睇學校教緊咩,如果學校著重修辭,畀啲修辭練習佢做,睇下錯幾多條。一嚟可以配合到考試範圍,二嚟知道佢有咩唔得。」

按圖即睇各年級學習重點

+4

鼓勵學習 先了解孩子性格

孩子詞彙不足、學習心散、不愛閱讀等學習問題困擾不少家長,張欣欣表示,若要改善孩子弱點、鼓勵學習,首先要了解他們的性格,知道孩子「受邊套」。「小朋友都係人,每個人受嘅嘢都唔同,有啲需要讚美,有啲需要物質。例如達標就有貼紙,儲夠10個有獎。頭幾個鬆畀佢,去到第六、七個,佢哋就會搏老命!」

要提升閱讀興趣,張欣欣建議,讓孩子自行選擇感興趣的書籍。「唔好由爸爸媽媽揀書畀小朋友,俾佢自己去揀。因為題材有興趣,小朋友會更主動去問、睇多幾次,詞彙、成語就會自然印落個腦。」

家長做多一步 活用生活例子

張欣欣提醒,過去一年,學校的教學進度落後,但家長並不能掉以輕心。「學校唔會因為進度慢咗,而考淺啲,相反係將個進度交俾家長追。家長唔好剩係滿足老師嘅要求,而要盡量做多少少。」

他建議,家長可因應課題,讓孩子抄寫詞語,或選擇詞語,讓孩子進行造句練習。此外,若孩子不喜歡閱讀,家長亦可利用不同媒介,例如短片,協助孩子學習。「記嘢可以靠圖像、聲音,睇一條Youtube片,但唔開聲,只睇字幕,睇多幾條自然會睇得快;冇記性嘅,將筆記錄音,間唔中播,加深印象。」

「以往經常用『小明』做例子,但其實『小明』已經好out!如果同小朋友講『喺旺角攞到Anson Lo簽名,我就『喜形於色』』,佢就會更明白呢個詞彙點樣運用。利用有趣嘅生活例子,同個詞語連埋一齊,都係一種記憶方法。」張欣欣補充,試題不時要求學生引用課外知識輔助說明,家長不妨多向孩子分享時事及生活例子,有助臨場發揮。

升中前學好文言文

張欣欣表示,當向孩子解釋詞語,家長不宜只執著於解釋詞意,可多解釋詞性,幫助記憶。「例如『疑惑』、『懷疑』、『疑難』,對小朋友嚟講,三個都一樣。但當睇埋詞性,名詞、動詞、形容詞,對佢日後更有幫助。」

他提醒,對中學生來說,普遍的中文難題便是文言文。「好多時都係唔知點做,亂咁做。文言文點解考到今日仲考,就係因為扣到你分。」他建議,六年級的學生可利用派位後,升中前的階段,盡快打好文言文根基。「未入中一時,買文白對照嘅成語書。成語都有典故,小學已經十居其八都見過。每篇學一、兩個文言字詞,可能係『因為』、『之後』之類嘅時間詞,已經贏咗。文言文唔使識寫,識解就OK,小朋友就會有成功感。」

相關文章:網課令學生程度倒退 個別差異增大 名校前英文老師分享溫習貼士

+2

按圖即睇補充練習選購貼士

按圖即睇英文溫習貼士

+6
你可能感興趣