演繹真實人生 以「Believe」做好角色│人生導演課│冼振東專欄

撰文:賴家俊
出版:更新:

文:冼振東

Peter正在向兩位助教Joe和Catherine講解戲劇的培訓方式。

「首先搞清楚,學『做戲』係能夠令你更加識得『做人』。」

「做戲即係扮嘢喎,係假㗎噃。」Catherine直接指出。

「咁妳自問,妳係咪一日廿四小時對住任何人,都係咁真誠吖?」

「咁梗係唔係啦 …… 」反而Joe第一時間回應。

「咪係囉。」Peter做了一個極誇張的表情:「日常生活根本人人都喺道做緊戲,只係無人夠膽承認啫。」

圖片來源:@ Kvalifik/Unsplash

Peter在白板上大大隻字寫上: 「please don’t act!」

「叫人唔好做戲,即係叫人唔好虛偽囉。」Catherine相當認同。

「呢句嘢唔係叫人唔好做戲,係叫人唔好做戲做得咁假。」Peter頓了頓,「我哋成日話做人要真誠,但諷刺嘅係,只要除低咗個面具,就好難喺個社會道生存。」

「係,我哋係無時無刻都要戴上唔同面具做人嘅 … 但真誠待人都係必須個喎 ,唔係成個社會都好虛偽。」Catherine說。

「真係要完全『真誠待人』係無可能㗎。我哋追求嘅,應該係戴咗面具咁去真誠待人。」

「咁矛盾?」Catherine說。

「首先,如果你係做自己嘅『真誠』,就一定會自私自利,因為做自己嘛。但係如果你戴咗『角色』嘅面具,即係例如你戴咗『爸爸』呢個面具,你就要好真誠咁做『爸爸』呢個角色嘞 … 」

Joe和Catherine沉吟著。

【延伸閱讀:演戲跟踢球一樣 合作才能講好故事│人生導演課│冼振東專欄

「其實我哋每個人都想做好人生入面每個角色。」

一頓 ───

「所以簡單啲講,我哋係戴住角色嘅面具做人嘅。如果你想做好一個角色,就要真誠。對自己真誠、對人哋真誠,同埋好真誠咁諗吓點樣將個角色做到最好。」

「即係要時常反思,點樣戴好啲個角色面具 …… 」Joe開始明白。

「可以咁講,」Peter解釋:「人一生喺唔同階段,其實會做好多唔同角色。好多時生活得唔開心,係因為有一、兩個角色做得唔夠好。要做得好,其實唔應該去 『演』(act)個角色,而係要「成為」(be)嗰個角色:即係用『真誠』去成為嗰個理想嘅角色。所以就要提醒自己:『please don’t act!』」

怎樣做呢?Peter認為,演員演繹角色,過程是:

演員想要成為(劇本中)的人物 (character),以演好舞台上的角色 (role)

而真實人生,我們的演繹過程是:

自己想要成為(理想中)的人物 (character) ,以演好生活中的角色 (role)

「不斷反思、檢討,諗吓理想嘅人物(例如理想嘅丈夫)係點嘅,就喺日常生活演繹出來,成為角色。」Peter說:「角色要演得好呢,得一個方法,就係『相信』。」

Joe問:「角色做得唔好,因為唔夠『真誠』?」

「要真誠,就要『相信』,」Peter在白板寫上 「believe」。「相信自己就係嗰個理想嘅人物,先至能夠演活角色。」

圖片來源:@Ran Berkovich /Unsplash

上過演技工作坊的Catherine早就知道演戲要「believe」,但這是很難掌握的概念。她期望Peter說得實在一點。

「要做到當然要keep住訓練啦。」Peter擦去白板上的「believe」,寫上:「be + lie + ve」。

「具體啲講,『believe』就係令自己 『be』喺個『lie』入面,即係生活喺個『大話』入面。當然你會話:咁咪即係虛偽囉?其實唔同,虛偽係指嗰種大話嘅狀態係有唔好嘅目的,通常都係一啲自私自利嘅目的,但生活喺個理想角色嘅大話入面,可以話係一種成長。」

「咁『ve』呢?」

「將『ve』 當成 『we』,就係唔單只你自己要相信,亦都要令到其他人相信。戲是大家(we)一齊演出來嘅,其他人都要相信你,成台戲先至成立。」

「be + lie + ve」…… Joe與Catherine逐漸明白,眼前的Peter之所以是個大師,很大程度上是因為他深深「believe」自己是個大師。

封面圖片:@Steven Libralon/Unsplash

(專欄「人生導演課」每月刊出,標題由編輯撰寫,原題:「《BELIEVE》」。本文不代表藝文格物立場。)

作者簡介|冼振東,明愛華德中書院助理校長(演藝),深信戲劇能成就全人教育,致力栽培學生成為自己人生舞台的導演:「導好自己・演好人生!」

【英國畫家 William Hogarth 經典《時髦的婚姻》,六幅畫訴說一個上流不幸婚姻故事!】

+1
發表評論...