【01齊跑．搵食姐】朋友你跑步因為愛定責任？ 係肥呀！
撰文：曾柏熊
出版：更新：
大家仲記唔記得自己當初開始跑步嘅原因？
到底點解從來死都唔肯做運動嘅搵食姐，無啦啦會的起心肝去跑步，仲幫自己定下60公里嘅「12月MinPlay」呢？
其實，未就係因為嗰個困擾所有女人嘅「魔咒」……
話說早幾日，「為食而生」嘅搵食姐收到個十幾年冇聯絡過嘅幼稚園同學來電，原來呢位朋友下年年頭結婚喇，仲邀請佢做佢伴娘添；雖然大家咁耐無見，但搵食姐依然好感動，原來呢個幼稚園同學一直冇忘記佢呀，而且仲一直當佢Best Friend，連結婚都叫佢做伴娘，所以諗都唔諗，即刻就應承咗人。
第二日返工，搵食姐梗係忍唔住同同事Mean姐分享呢件事啦。點知Mean姐話：「傻豬嚟嘅，唔好咁單純啦，結婚咁大件事，識搵梗係搵個樣又衰過自己、肥又肥過自己嘅人做伴娘啦。咁情況唔諗起你仲有邊個？」
事實永遠殘酷，大受打擊嘅搵食姐覺得感情被欺騙，好唔開心……但應承得人又冇得唔頂硬上。呢個時候，一腔熱血突然由搵食姐嘅腸胃間湧上頭。