永樂園熱狗腸縮水？網民笑「新縮腸」細過手指尾 1原因仍值支持
撰文：豬肉丸
出版：更新：
永樂園餐廳已屹立中環超過40年，最出名招牌熱狗王，號稱日賣2000隻，不論本地人或外地遊客之間都人氣甚高！不過，近日就有網民於網上發文，表示發現永樂園熱狗王的腸仔「大縮水」，有人形容「細條過手指尾」，笑說是「新縮腸」，即睇網民點睇！
（圖片來源：openrice）
中環永樂園熱狗腸大縮水細條過手指尾 被封「新縮腸」
中環老字號永樂園餐廳以熱狗王馳名，據說熱狗包烤得外脆內軟，夾有鮮嫩荷蘭腸仔，加上秘製沙律醬，創下日賣2,000隻佳績。然而，近日有熟客幫襯，發現永樂園熱狗的腸仔疑似大縮水，表示：「你look（碌）腸想點？香港真係好凍啊喂！」
永樂園熱狗腸被網民恥笑「新縮腸」。（圖片來源：截圖自「香港茶餐廳及美食關注組」Facebook群組）
網民笑不停：呢碌係臘腸呢喎，有你着數啦
帖文引來大批網民紛紛留言，不少人恥笑這款熱狗腸是永樂園新品「新縮腸」，「我唔會幫襯，得我手指尾咁大！」！有老食客網民又指：「我食佢個熱狗既年代個包同條腸係一樣咁長，不過講緊係七十年代果陣時永樂園對面仲係Dodwell（天祥洋行）」。
又有人安慰樓主該發揮阿Ｑ精神，樂觀點睇件事，反應該是「嘩，咁大個包，抵。」、「呢碌係臘腸呢喎，有你着數啦」、「益街坊～隻包加大咗好多倍！」，對話十分搞笑！
永樂園熱狗王早前的食物賣相，腸仔明顯大好多。（雙腸包另外加錢）（圖片來源：openrice）
元祖級腸仔，真係大過而家好多！（圖片來源：openrice）
一口入魂秘製沙律醬 網民指識食係食個醬
雖然網民大都食花生恥笑居多，不過也有網民認真指永樂園沙律醬才是靈魂，醬汁集酸甜味、芥末味以及牛油香於一身，神奇地反而好解膩，好食到令人「念念不忘」！有人更引述十幾年前，其沙律醬好味到曾有人想用三十萬讓老闆賣出醬料秘方，不過被老闆一口回絕，又指「百物騰貴，醬料依舊都算數啦」、「當食個醬」。
因為秘製沙律醬太好味，有人甚至食「走腸」熱狗。（圖片來源：openrice）