【矚目配角】羅樂林27歲做第一代楊過:拍完劇第二日就執笠

撰文:
最後更新日期:

羅樂林在電視圈縱橫45年,老土點說,已經看破一切。經歷過男主角的年代,佳視結業,徬徨之下加入麗的(亞視),輾轉再去到TVB,一直去到現在。歷盡艱辛,好多東西都已看透,羅樂林坦言接受比難受更多。

接受人生無常

回想當年佳視結業,羅樂林也是年輕時,突然「被」失去工作當然義憤填膺,甚至試過上街遊行,他說:「入咗呢行咁耐,我經歷咗好多嘢,當年佳視結業,我哋去遊行過,喺執嗰個過程想攞返合約入面(待遇),但其實係攞唔到。我覺得人生好多嘢你係估唔到,我又好接受現實,所以我覺得冇問題,當然好多嘢我見到係唔開心,希望唔好再發生。」

羅樂林都試過被炒魷。(葉志明攝)

突然失去工作,甚至是聽到電台才得知消息每個人都會感到徬徨,羅樂林也不是大富之後,當然會為前途感到憂慮。「有好多人想幫我哋攞返啲應得嘅嘢,唔知點解攞唔到。都有去遊行,希望幫到員工,例如簽咗合約突破冇咗,合約裡面嘅賠償係咪應該有呢?我印象到而家都係乜都冇。係徬徨架,唔係炒魷,係突然冇咗份工,噚晚仲開緊工拍緊劇,突然就話成間公司冇咗,徬徨㗎!」這件事件羅樂林對人生又有新體會,老土講句世事無常,幸好很快便有麗的向他招手,繼續他的演藝事業。

羅樂林看透一切。(葉志明攝)

接受自己定位

TVB近年一直被指待薄員工,甚至有前老前輩力證,羅樂林卻接受一切,反而令他為人更開心。「公司有公司做法,而家每間公司有佢做嘢原則,公司賺錢時可能鬆動啲,艱難時佢另外公司有制度我哋又唔知,我覺得我哋做好自己本分。當然老人家咁多年,為社會付出咁多,希望整個社會都公平啲對佢哋。公司都係咁,員工為公司付出咁多,亦好勤力為公司做咗咁多嘢,希望相對會好啲。」羅樂林雖然也希望公司會有更好的待遇給員工,但他也知道做好自己本分更重要,最緊要是你享受演戲,不要令自己太多介懷,他說:「後生緊係做小生,緊係另一個情況,中年做中生,老年做老生,一定要接受呢樣嘢,我又唔覺得我做老生有問題,演好自己本身個角色就得,當然你要享受你工作先得,如果你成日計以前做小生而家做老生,會唔會開心?我從來冇呢樣嘢,我係好接受呢樣嘢,咩年紀做咩嘢。」

令自己接受,總好過令自己難受。(葉志明攝)

接受時代變遷

還有一項接受,接受年代的變遷,經歷過三間電視台的洗禮,見證香港電視業的輝煌盛世,去到現在收視下跌,羅樂林很明白當中道理。「而家一定唔會返屋企就追劇。我哋年代唔同,今日唔睇,過咗就過咗,冇得睇。而家唔同喇個年代,你要接受同明白,係咁喇,香港情況唔同第二個國家或者中國入面一個省幾十個電視台,大家會爭個Rating,而家冇喇香港,大家返到屋企鍾意睇咪睇。(冇對手?)可以咁講,而家香港得一兩間電視台,幾多年前有佳視,有三間都話收益、廣告支持唔到,所以香港相對嚟講市場係好窄,一窄嘅幕前幕後出路都相對少咗,咁冇競爭變咗大家個收入各方面都會少。」其實做電視的人,很多都明白這個道理,大家都希望百花齊放,希望香港人支持本土影業,希望投資方、廣告商繼續支持,但現實環境又令你不得不妥協,但與其難受過生活,倒不如選擇接受,看開一點。

其實電視人,反而希望百花齊放。(葉志明攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。